دەمێ چوونا كاروانێ ئێكێ یێ حەجیێن هەرێمێ هاتە دیاركرن
ئەڤرۆ
پەیڤدارێ رێڤەبەریا گشتییا حەج و عومرێ ئاشكرا كر، ل رۆژا 9/6/2023 دێ ئێكەم كاروانێ حەجیان ژ هەرێما كوردستانێ بۆ وەلاتێ سعوودیێ ب مەرەما ئەداكرنا فەریزا حەجێ ب ڕێكەڤیت و هەموو بەرهەڤی ژی بۆ ئەنجامدانا حەجا ئەڤ سالە هاتینە كرن.
كاروان ستوونی، پەیڤدارێ رێڤەبەریا حەج و عومرێ ل هەرێما كوردستانێ بۆ ئاژانسا خانی دیار كر، هەموو بەرهەڤی بۆ پرۆسا حەجا ئەڤ سالە هاتینە كرن و تیمەكا وەزارەتا ئەقاف و كاروبارێن ئایینی نوكە ل وەلاتێ سعوودیێ بەرهەڤیان بۆ چوونا حەجیێن هەرێما كوردستانێ دكەت و گۆت: «هەموو بەرهەڤی ژی هاتینە كرن هەر ژ جهێ مانا حەجییان و ئۆتێل و خوارن و پێدڤیێن رۆژانە».
كاروان ستوونی گۆتژی: «بڕیارە ئێكەم كاروانێ حەجیێن هەرێما كوردستانێ ل رۆژا 9/6/2023 ب رێیا هشكاتی بەر ب وەلاتێ سعوودیێ چیت و د دووڤ دا دێ چەندین كاروانێن حەجییان بۆ بجهئینانا فەریزا حەجێ بەر ب سعوودیێ چن، بەلێ ئەڤێن بڕیارە ب رێیا ئاسمانی بچن دێ پیچەكێ گیرۆ بن».
ل گورەی زانیاریان، ئەڤ سالە ل دووڤ پشكا هەرێما كوردستانێ، بڕیارە چار هزار 685 كەس فەریزا حەجێ ئەنجام بدەن.
