مە هیڤی هەنە دێ رۆژێن گەشتر ل داهاتی دا بینین
دیدار، سالار محەمەد دۆسكی:
پێشمەرگە و زیندانییێ سیاسی، جاسم سەعدوللا جاسم پیرۆمەری ژ بنەمالەكا نشتیمان پەروەر، ل سالا 1943ێ ل گوندێ پیرۆمەرا ژ دایك بوویە، ل سالا 1963ێ بوویە پێشمەرگە، دو جاران بریندار بوویە، برایێ دو شەهیدانە و سالەك و پێنچ هەیڤان زیندانیێ زیندانا ئەبو غورێب بوویە.
جاسم سەعدوللا پیرۆمەری بۆ رۆژناما ئەڤرۆ گۆت: پشتی من خواندنا خوە یا سەرەتایی بدووماهی ئینای، چوومە قوناغا ناڤنجی ل دهۆكێ و هەتا پولا سیێ ناڤنجی من خواند و من دەست ژ خواندنێ بەردا چووم بوومە پێشمەرگە، ئەڤە هات پشتی رۆژەكێ ل گەل هەڤالێ خوە (سەعدیێ ئوسێ) مە ل گەلی پیاسە دكرن، ئەفسەرەكێ حوكمەتێ هات و ئاخفتنێن كرێت گۆتنە خودێ ژێ رازی (مەلا مستەفا)ی و هەمی كوردان و دووڤدا من بەرسف وی دا، وی ژی شەقەك دانا من و گەلەك عاجز بووم و هاتمە مال من چیرۆك بوو دەیكا خوە گۆت دەیكا من گۆت ئەڤ شیرە ل تە حەرام بیت هەكە نەبیە پێشمەرگە و كەیفا من هات و سپێدێ چوومە گەرماڤا سەعید ئاغای و هەڤالەكێ رێك نیشا من دا و چوومە (شاوریكێ) وی دەمی بارەگایێ پێشمەرگەی وی گوندی بوو، وی دەمی (تێلی ئێكمالی) سەركردەكێ پێشمەرگەی بوو ل وێ دەڤەرێ و ئەز نە وەرگرتم گۆت تویێ بچوویكی چونكە ژیێ من 18 سال بوو، نەچاربووم رۆژا دووڤدا زڤریمە مال، سالا 1963ێ بوونە دانوستاندن د ناڤبەرا پارتی دیموكراتی كوردستان و حوكمەتا عیراقێ دا، 25/3/1963ێ چووم بوومە پێشمەرگە و بابێ من تڤەنگەك بوومن پەیداكر وی دەمی تەناهی بوو چونكە دانوستاندن بوون.
جــــاسم پیرۆمەری گۆتژی: دەمێ بوویە شەڕ ل سالا 1963ێ ل گەل (خەلویێ ئوسێ) بووم و بریندار بووم، ل سالا 1974ێ ژی ئەم چەند كەسەك بووین مە بهێنا خوە ڤەدا ژ نیشكەكێ ڤە بەركەكێ توپێ هات ب ناڤ كوما مە كەت و بریندار بووم.
جاسمی گۆتژی: پشتی نەكسویێ ل سالا 1976ێ هاتمە دەستەسەركرن ئەڤە و پشتی مە دەست ب دروستكرنا شانێن نهێنی كر و شانەكا مە ئاشكرابووی هاتمە زیندانكرن و شانامە گەلەك یا بەرفرەه بوو ل دهۆك و زاخو و سێمێل و ی دەمی ئەز بەرپرسێ رێكخراوا (كاوە) بوو و مە گەلەك كریار ل ناڤ باژێری ئەنجامدان و ئێكسەر من پەیوەندی ل گەل لژنا محلی هەبوو، كەسەك هەبوو بناڤێ( رەمەزان) مامۆستا بوو ل گوندێ (هەبلەهێ) وی ئابوونە دگەهاندنە پێشمەرگەی و دەنگ و باس گەهاندنە من و مە بەلاڤدكرن.
جاسم سەعدوللا پیرۆمەری گۆت: وی دەمی كەسەكێ خەلكێ سلێمانیێ ل دهۆكێ بوو بەرپرسەكێ رێكخستنێن نهێنی بوو ل زاخۆ فرۆكێ هاڤێتێ و شەهید بوو و پشتی چووینە سەر تەرمێ وی جانتێ وی ڤەكرن ناڤێت هەمی رێكخستی یا تێدابوون ئەو بوو مە ئاشكرابووین و هندەكا خوە قورتالكر گەهشتنە پێشمەرگەی و هندەك ژی كەفتنە دەستێ رژێمێ و ئەز كەتمە دەستێ رژێما بەعس و دو سالا و پێنچ هەیڤان ل زیندانێن حزبا بەعس من ژیان دەربازكر و گەلەك ب نەخوشی.
جاسمی گۆتژی: پشتی هاتینە دەستەسەكرن ڤەكولین ل گەل من هاتەكرن وی دەمی ئەز ئەمین صندوقێ فەرمانگەها كارەبێ بووم و گەلەك بزاڤكرن ناڤا بێژم من چ ناڤ نەگۆتن، خودێ ژێ رازی (محەمەد بەدل) ب چاڤ گرتی ئینا نیك من و گەلەك زوری من كر دانپیدانێ ل سەر بكەم و من نەكر دووڤ دا (رەمەزان سلێمان هەدنی) ئینا هێشتا ل بەردەرگەهی رەحمەتی (رەمەزن) گۆت مام جاسم تو هەڤالێ مەیی و لەشێ خوە نەئێشی نە، ئەفسەری گۆت تە هەیڤانە ئابوونە چەند دا من گۆتێ هەیڤانە من دینارەك دا و هەمی من كومكر وبۆ پێشمەرگە دهاتە بلندكرن و گۆت كارێ تە چ بوو من گۆتێ رێكخستنێن نهێنی، دووڤ دا برینە كەركووكێ و ماوێ دو هەیڤان مام و هاتینە دادگەهكرن بۆ زیندانا ئەبو غورێب رەوانەكرین و حەفت هەڤالێت مە سزایێ سێدارێ ل سەر هاتە سەپاندن، ئەم نێزیكی 30 كەسان بووین و بتنێ مە دو هەتا سیان ئێك و دو نیاسی و ئەم هەمی ئێك رێكخراو بووین، ل سالا 1977 ب لێبورینەكا گشتی هاتینە ئازادكرن و دادگەهێ (15) سالان ئەم دادگەه كربووین، بەری ئەم بهێنە ئازادكرن حوكمەتێ لێبورینەك دەركر بۆ هەمی كەسان و بتنێ كورد نەبیت ئەم سپێدێ چووینە سەرێ ئێك و دو مە گۆت مادەم حوكمەتێ ئەم ئیناینە بەرامبەر خوە دێ مە ژی ئازاد كەت و ئەو بوو سالا دووڤ دا هاتینە ئازادكرن، 18/9/1977 هاتینە ئازادكرن، پشتی هاتیمە ئازادكرن جارەكا دی مە دەست ب رێكخستنێن خوە كر و دەمێ هاتیمە ئازادكرن برایێ من (عصمت) یێ زیندان كربوو ل ئەبو غورێب و 20 سالان هاتبوو زیندانكرن.
جاسم سەعدللا زێدەتر گۆت: وی دەمی زولمەكا مەزن ل سەر كوردان هەبوو لەوما خەلك دگەهشتنە پێشمەرگەی و گەلەك ژ خەلكی دبێ چەك بوون، و چوونە ناڤ رێزێن پێشمەرگەی و حوكمەتێ گەلەك زۆلم ل خەلكی دكر، و برنە كەلها نزاركێ و خەلكێ مە بێزار ب بوو.
جاسم پیرۆمەری گۆت: ئەم جەیش شەعبی بووین ل رەبیعا هنداڤ تەلەڤزیونا دهۆك یا نوكە جارەكێ (دیار محەمەد سەعید دۆسكی) هات گۆت جاسم هلو دا بچین حوكمەتێ (حەسەن عەلی خەنجەر، عبدالرحمان گولی) ل سەر جادێ گرتن و ئەم ب ترۆمبێلەكێ دووڤدا چووین و هەتا گەهشتین هەر دو بربوونە ل كەلها نزاركێ ڤە و مە بریار دابوو ب رێكێ ڤە بینین دا هاڤێنێ و بەرگێریێ ژێ كەین.
جاسمی گۆتژی: وەك رێكخستنێن نهێنی مە چالاكی دكرن بەلێ دمەدەنی بوون، جارەكێ چووینە ئورزدی و مە چاكیت دكرە بەرخوە ب بهانا هندێ دێ كرین و مە بەلاڤوكێن حزبی دكرنە دبەریكێن چاكیتادا و دەركەتین و هندەكا زانی و ئێكسەر ژ ئورزدی دەركەفتن و رەڤین و گەلكە بەلاڤووك مە ب دیوران ژی ڤەدكرن.
جاسم سەعدوللا پیرۆمەری هێشتا گۆت: پەرستیارەك هەبوو یا بەرواری بوو و رێكخستی یا رێكخراوا مە بوو و بەردەوام بوومە كەل و پەل ژ نەخوشخانێ تینانە مال و مە دگەهاندنە پێشمەرگەی و پتریا كومبوونێن مە ل (دولبێ) بوون و پتریا خەلكێ گوندی هەڤالێت مە بوون.
جاسمی سەعدوللا ئەو ژی گۆت: بابێ من سالەكێ ل زیندانا مویسل هاتبوو زیندانكرن، برایێ من (عصمت و حكمەت و ناجی) هاتبوونە زیندانكرن، برایێ من (ناجی) حوكمەتێ سێدارە دا و برایێ من ( حكمت) ل پشتا قەلادزێ هاتە شەهیدكرن و هەر دو برایێن من گەنج بوون و دەمێ (ناجی) سێدارەدای نەهێلا تازیێ بدانین وئە ژی هاتبوومە زیندانكرن و حوكمەتێ گەلەك ب چاڤەكێ كێم تەماشەی بنەمالا مە دكر.
جاسم سەعدوللا جاسم، ل دووماهیێ خواست هەمی مللەتێ كورد ئێكگرتی بیت، چونكە ڤی مللەتی گەلەك قوربانی پێخەمەت تەناهی و ئارامی یا كوردستانێ داینە و دڤێت كوردستان بەری هەرشتەكی بیت و مە هیڤی هەنە دێ رۆژێن گەشتر ل داهاتی دا بینین.
