رێیێن هەژمارەكا گوندان ل دەڤەرداریا چەمانكێ دهێنە ڤەكرن
ئامێدیێ، مەحمود نهێلی:
ب مەرەما پتر خزمەتكرنا وەلاتیان و گەهاندنا پڕۆژەیێن خزمەتگوزاری بۆ دەڤەرێ، ب تایبەتی ژی بۆ گوندان، دەست ب ڤەكرنا رێك و جادەیێن هەژمارەكا گوندان ل سنوورێ ناوچەداریا چەمانكێ هاتیە كرن.
ئیسماعیل حەمید، رێڤەبەرێ ناوچەداریا چەمانكێ بۆ رۆژناما ئەڤرۆ دیار كر، پتر ژ مەهەكێ یە وان دەست ب ڤەكرن و چێكرنا رێك و جاددەیێن هەژمارەكا گوندان ل سنوورێ ناوچەداریا چەمانكێ كریە و گۆت: «مە ب هەڤكاری ل گەل رێڤەبەریا سەخبێركرن و پاراستنا رێك و پران ل دهۆكێ هەتا نوكە كار د چێكرنا رێكێن 20 گوندان دا كریە و 95% كار تێدا ب دووماهی هاتیە».
دیار ژی كر، ل سنوورێ ناوچەداریا چەمانكی 48 گوند هەنە و رێكێن هەموو گوندان هاتینە ڤەكرن و چێكرن، لێ نوكە كار د ڤەكرنا رێكێن زەڤی و بیستانێن گوندیان دا دهێتە كرن و گۆت: «ئەم ل سەر خزمەتكرنا خەلكێ دێ بەردەوام بین، هەتا هەموو پێدڤیێن وان دهێنە دابینكرن و ئاریشێن وان دهێنە چارەسەركرن، ژ بەركو ژ ئەنجامێ باران و لەهیان زیانێن مەزن گەهشتبوونە رێك و رێبارێن وەلاتیان».
