دو وەلاتی د ئاڤێ دا خەندقین
د دو روودانێن جودا یێن خەندقینێ دا ل سنوورێ پارێزگەها دهۆكێ، دوهی 12/6/2023 گەشتیارەكێ ب رەگەز عەرب ل ناوچەداریا چەمانكێ و ئاكنجیەكێ دەڤەرداریا بەردەڕەش د ئاڤا خازری دا خەندقین.
گەشتیارەكێ عەرەب بناڤێ (یاسر عەمار) كو ئاكنجیێ بەغدایە و ب مەرما گەشتێ سەرەدانا گەلیێ كانی مازێ ل ناوچەداریا چەمانكێ كربوو، لێ د دەمێ مەلەڤانیكرنێ دا ل ئێك ژ سەیرانگەهێن سنوورێ وێ ناوچەداریێ خەندقیە.
وەلاتیەكی ناوچەداریا چەمانكێ بو رۆژناما ئەڤرۆ دیار كر، ژییێ وی دۆرێن 30 سالیێ بو، پشتی تەرمێ وی ژ لایێ تیمێن هاڤینگەهێ و پۆلیسان ژ ئاڤێ هاتیە دەرئێخستن، بۆ نۆشداریا داد ل دهۆكێ هاتە هنارتن و پاشی رادەستی كەسوكارێن وی هاتە كرن.
دیسا هەر دوهی پشتی نیڤرۆ وەلاتیەكێ 21 سالی، كو ئاكنجیێ تاخێ رۆناكی بوو ل دەڤەرداریا بەردەڕەش، د ناڤ رووبارێ خازری دا ل نێزیك پرا مەندان خەندقی و تەرمێ وی ژی بۆ نۆشداریا داد ل دهۆكێ هاتە ڤەگوهاستن.
