بەرهەڤیێن پێكئینانا جڤاتا بلندا ئێزدیان دهێنە كرن
رێڤەبەرێ گشتی یێ كاروبارێن ئێزدیان دیار كر، كار ل سەر پێكئینانا جڤاتا بلندا ئێزدیان دهێتە كرن، پشتی پرۆگرام و كۆنفرانس دهێتە كرن، جڤات دێ هێتە راگەهاندن و دبێژیت: نوكە بەرهەڤیێن پێكئینانا جڤاتێ دهێنە كرن و ئێزدی ل سەرانسەری جیهانێ دێ پشكداریێ تێدا كەن.
سعود مستۆ، رێڤەبەرێ گشتی یێ كاروبارێن ئێزدیان ل وەزارەتا ئەوقاف و كاروبارێن ئایینی ل هەرێما كوردستانێ بۆ رۆژناما ئەڤرۆ گۆت: «پێنگاڤێن پێكئینانا جڤاتا بلندا ئێزدیان دەستپێكرینە، بەردەوام میرێ ئێزدیان ل گەل رەوشەنبیر و كەسایەتیێن ئێزدی كۆمبوونان ئەنجام ددەت، بۆ وێ چەندێ ئەڤ جڤاتە دەمێ دهێتە راگەهاندن، هەموو ئێزدی تێدا پشكدار ببن و ب باشترین شێوە خزمەتا ئێزدیاتیێ ل سەرانسەری جیهانێ بكەت».
ناڤهاتی ئاشكرا ژی كر، ئێزدیێن هەرێما كوردستانێ، سووریا، توركیا، ئەرمینیا، جورجیا و ئورۆپا دێ بنە ئەندام د وێ جڤاتێ دا و نوونەرێن ئێزدیێن هەموو دەڤەران دێ تێدا بن و بارەگایێ جڤاتێ ژی دێ ل هەرێما كوردستانێ بیت.
