دەست ب بەلاڤكرنا پێشینەیێن خانیان دێ هێتە كرن
جێگرێ سەرۆكێ ئێكەتیا وەبەرهێنەران ئاشكرا كر، ئێك ژ خالێن رێككەفتنا د ناڤبەرا مەسروور بارزانی و سودانی دا دەستپێكرنا پێشینەیا ئاڤاكرنا خانیانە بۆ وەلاتیان و دبێژیت: بەرهەڤی هاتینە كرن بۆ دانا پێشینەیان و دێ هەژمارەكا زۆرا وەلاتیان ژێ مفادار بن.
كەمال ئەحمەد، جێگرێ سەرۆكێ ئێكەتیا وەبەرهێنەرێن كوردستانێ بۆ رۆژناما ئەڤرۆ دیار كر، ئێك ژ وان خالێن د ناڤا رێككەفتنا مەسروور بارزانی، سەرۆكێ حوكمەتا هەرێماكوردستانێ و محەمەد شیاع سودانی، سەرۆكوەزیرێن ئیراقێ دا، ئەوە دەست ب بەلاڤكرنا پێشینەیێن ئاڤاكرنا خانیان ل هەرێما كوردستانێ بهێتەكرن، ئانكو وەلاتیێن هەرێما كوردستانێ دێ مفادار بن ژ وەرگرتنا پێشینەیێن خانیان دێ مفادار بن و وەكو بەرێ پرۆسا دانا پێشینەیان دێ هێتە دەستپێكرن و هەژمارەكا زۆرا وەلاتیان دێ ژێ مفادار بن.
كەمال ئەحمەد گۆت: «بانكا ناڤەندی و بانكێن دی ژی بەرهەڤی كرینە بۆ دانا پێشینەیان بۆ وەلاتیێن هەرێما كوردستانێ، ئەڤێ بڕیارێ ژی دێ چەندین مفا بۆ وەلاتیێن هەرێما كوردستانێ هەبن و دێ كاریگەری ل سەر بازارێ ئەرد و خانیان ژی هەبیت».
