چەندین رۆژە فرۆكە و توپخانێن توركیا گوندێن دێرەلۆكێ بوردۆمان دكەن
ئامێدیێ، مەحمود نهێلی:
بۆ دەمێ چەندین رۆژایە ل دووڤ ئێك فرۆكە و توپخانێن لەشكرێ توركیا چەندین گوندێن سنوورێ ناوچەداریا دێرەلۆكێ بوردۆمان دكەن.
فایق بلاڤەی، ئاكنجیێ گوندێ بلاڤە بۆ رۆژناما ئەڤرۆ دیار كر، دەمێ چەندین رۆژایە دەوروبەرێن گوندێ وان ژ لایێ فرۆكە و توپخانێن لەشكرێ توركیاڤە دهێنە توپبارانكرن و گۆت: «هندەك جاران ئەڤ بۆردۆمانە گەلەك نێزیكی گوندێ مە بووینە و زیان گەهشتیە خانی و رەز و باغێن مە، دیسا ئەو دەڤەرێن پتر دهێنە بوردۆمانكرن ژ سەرێ چیایێ هنداڤی گوندێ وان و گوهەرز و بلاڤە و سگێرێ و سەرگەلێ پێك دهێن».
بەری چەند رۆژان ژی گوندێن رەشاڤە و زلیێ و گوندێ كەڤنێ بەرچی و سەرگەلێ ل دەڤەرا نهێلێ ژ لایێ توپخانێن سۆپایێ توركیا ڤە هاتبوونە توپبارانكرن.
ل دەستپێكا تێكچوونا پرۆسا ئاشتیێ ل سالا ٢٠١٥ هەتا نوكە پتر ژ ٤٠ وەلاتیێن سنوورێ دەڤەرداریا ئامێدیێ شەهید و بریندار بووینە، كو پتریا وان یێن هەردو ناوچەداریێن دێرەلۆك و شێلادزێ بووینە.
