70 پڕۆژەیێن گەشتوگوزارێ دێ هێنە بجهئینان
هەولێر، قائید میرۆ:
پەیڤدارێ دەستەیا گەشتوگوزارێ ل هەرێما كوردستانێ ئاشكرا كر، دیزاین بۆ 70 پڕۆژەیێن گەشتوگوزارێ هاتیە كرن و بڕیارە ب رێیا دەستەیا گشتیا وەبەرهێنانی ئەو پڕۆژە بهێنە بجهئینان و دبێژیت: زۆربەیا وان ژی دكەڤنە دەرڤەی سەنتەرێ باژێڕان.
ئیبراهیم عەبدولحەمید، پەیڤدارێ دەستەیا گەشتوگوزارێ بۆ رۆژناما ئەڤرۆ دیار كر، دەستەیا گەشتوگوزارێ دیزاین بۆ 70 پڕۆژەیان بەرهەڤكریە و گۆت: «بڕیارە ئەو پڕۆژەیە ب رێیا دەستەیا گشتیا گەشتوگوزارێ بهێنە بجهئینان، هەر وەبەرهێنەرەكێ بخوازیت پشكداریێ بكەت، دشێت د وان پڕۆژەیێن گەشتوگوزارێ دا پشكداریێ بكەت، زۆربەیا وان پڕۆژەیان ژی دكەڤنە دەرڤەی سەنتەرێ باژێڕان و ل جهێن گەشتیارینە، ئەنجامدانا پڕۆژێن گەشتیاری ل دەرڤەی باژێڕان دێ كاریگەری ل سەر پەیداكرنا دەلیڤێن كاری هەبیت و هەژمارەكا زۆرا وەلاتیان ژی دێ ژێ مفادار بن».
ئیبراهیم عەبدولحەمید گۆتژی: «دەستەیا گەشتوگوزارێ بەردەوام یا كار بۆ ئینانا وەبەرهێنەرێن بیانی دكەت، كو پشكداریێ د كەرتێ گەشتوگوزارا هەرێما كوردستانێ دا بكەن، چونكی پلانا حوكمەتا هەرێما كوردستانێ ئەوە؛ زێدەتر گرنگی ب كەرتێ گەشتوگوزارێ بهێتەدان و د سالێن بهێن دا ژی دێ پلانا حوكمەتێ رەنگڤەدان ل سەر ئەڤی كەرتی هەبیت».
