جهێ چارستین یێ شوونواری ل دهۆكێ دهێتە سەخبێركرن
د. بێكەس بریفكانی، رێڤەبەرێ شوونوار و كەلەپووری ل پارێزگەها دهۆكێ، بۆ رۆژناما ئەڤرۆ دیار كر، رێڤەبەریا شوونوار و كەلەپووری ل پارێزگەها دهۆكێ ب پشتەڤانیا رێكخراوا یونسكۆ و رێكخراوا كار یا نێڤدەولەتی دێ رابیت ب سەخبێركرنا جهێ چارستین و دبێژیت: ئەڤ پڕۆژە دێ دەلیڤا 10 هزار رۆژێن كاری بۆ كرێكاران، كو خەلكێ دهۆكێ نە دابینكەت.
ناڤهاتی گۆت: «پڕۆژەیێ سەخبێركرنا جهێ چارستین ئێكە ژ پڕۆژەیێن گرنگێن شوونواری ل سەنتەرێ پارێزگەها دهۆكێ، كو ب هاریكاریا پارێزگەها دهۆكێ و رێڤەبەریا گشتیا شوونوار و كەلەپوورێن هەرێما كوردستانێ و ب سەرپەرشتی و چاڤدیرێیا رێڤەبەریا شوونوار و كەلەپوورێن دهۆكێ دهێتە بجهئینان، پارەیێ پڕۆژەی ژ لایێ ئێكەتیا ئورۆپی ڤە هاتیە تەرخانكرن، كو 731 هزار دۆلارێن ئەمریكینە و بودجا 20% ژ كەرستێن كاری ژ لایێ پارێزگەها دهۆكێ ڤە هاتینە تەرخانكرن».
د. بێكەس زێدەتر گۆت: «جهێ چارستین ئێكە ژ جهێن شوونواری ل پارێزگەها دهۆكێ و بوویە سومبۆلەكا شوونواری و گەشتوگوزاری بۆ دەڤەرێ و خودان میژوویەكا كەڤنارە، بۆ هزارا ئێكێ یا بەری زایینی ڤەدگەڕیت، جهەكێ ئاینیێ زەردەشتیانە كو پێكهاتیە ژ چەندین پێگەهێن شوونواری یێن گرنگ وەك شكەفتا چارستین و ئەتشگایێن ڤەكری و جویێن ئاڤی یێن گرێدایی ب ئایینی ڤە و ناوسك و جهێن دروستكرنا شەرابا پیرۆز و كێلیا شەدا یان (دایخما) و گورێن ڤەكری، پڕۆژە پێكهاتیە ژ دروستكرنا رێیەكا پیادە، كو د كەڤن دا هەبوویە و دێ هێتە سەخبێركرن هەتا سەرێ كێلیا شەدا و سەخبێركرنا جهی و سەخبێركرنا شكەفتا چارستین و پاراستنا وێ و دروستكرنا تابلویێن شرۆڤەكرنێ و چاندنا رووبەرەكێ زۆر یێ كەسكاتی و گەهاندنا ئاڤێ و نیژەنكرنا ئاڤاهیێ سەرەكی یێ پێشوازیا گەشتیاران و گەهاندنا رۆناهیێ بۆ هندەك پشكێن جهێ چارستین ل دووڤ رێنمایێن شوونواری و گەلەك هووركاریێن دی».
