ئەمریکا نەڤێت پەیوەندیێن وێ و چینێ ئالۆزتر لێ بهێن
ب، سه‌رجان مەحمود:
ئانتۆنی بلینکن وه‌زیرێ ده‌رڤه یێ ئه‌مریکا پشتی پێنج سالان ژ بۆ چارەسەر‌کرنا پرسێن ل گەل وەلاتێ چینێ سه‌ره‌دانا باژێرێ په‌کین پایته‌ختێ چینێ کر و ل گەل چین گانگ وه‌زیرێ ده‌رڤه یێ چینێ هه‌ڤدیتنه‌ک سازکر. د هه‌ڤدیتنێ دا باشترکرنا په‌یوه‌ندیێن دو قۆلی یێن د ناڤبه‌را هه‌ردو وه‌لاتان دا هاته گه‌نگه‌شه کرن و وه‌زیرێ ده‌رڤه یێ ئه‌مریکا پشتی هه‌ڤدیتنێ راگه‌هاند کو هه‌ڤدیتنا وی ل گەل بەرپرسێن چینێ د هه‌وەکا ئه‌رێنی دا ده‌رباز بوویه و گۆت: (ئه‌م دخوازین پرسێن هه‌ی ب دانوستاندنان چارەسەر بکەین و رێ ل به‌ر ئالۆزیان بگرین، د چارچۆڤێ به‌رژه‌وه‌ندیێن هه‌ردو ئالیان دا په‌یوه‌ندیێن خوه بگه‌هیننە ئاسته‌کێ باش و د ڤێ چارچۆڤێ دا کۆمبوونا مه گه‌له‌ک باش بوو و دێ کۆمبوونێن مە ل گەل بەرپرسێن چینێ د بەردەوام بن).
وه‌زیرێ ده‌رڤه یێ چینێ ژی راگه‌هاند کو بێی گه‌نگه‌شه کرن و په‌یوه‌ندیێن دبلۆماسی چو پرس ل جیهانێ ناهێنە چارەسەرکرن و گۆت: (ئه‌م سه‌ره‌دانا بەرێز وەزیرێ دەرڤە یێ ئەمریکا بۆ وەلاتێ خوە ئەرێنی دبینین و ژ ئه‌ڤرۆ پێڤه دێ هه‌ول ده‌ین هه‌موو پرسان ب رێیا دبلۆماسیێ چارەسەر بکەین. ئه‌ز دکارم بێژم کو چ به‌رنامه‌کێ مه یێ نهێنی ل دژی ئه‌مریکا نینه و دڤێت بەرپرسێن ئه‌مریکا ژی رێزێ ل پرسێن ناڤ خوەیی یێن وه‌لاتێ مه بگرن).
هەژی ئاماژەپێدانێ یە ژ بەر پرسا تایوانێ و چەندین پرسێن دی پەیوەندیێن ئەمریکا و چینێ گەلەک ئالۆز بووینە، د دەمێن بۆری دا بەرپرسێن هەر دو ئالیان ب داخۆیانیێن توند دژبەریا هەڤدو کرن و چاڤدێرێن سیاسی ژی دیار دکەن، ئەمریکا دڤێت ل گەل چینێ پەیوەندیێن خوە تا رادەیەکێ ئاسایی بکەت، چونکی ئەمریکا نەڤێت چین پتر خوە نێزیکی رۆسیا بکەت، ئەو یەک دێ مەترسیێن مەزن بۆ بەرژەوەندیێن ئەمریکا ل جیهانێ هەبین.
