90 بنگــەهێن تۆمـاركـرنا چەكـی هـاتینە ڤەكـرن
پەیڤدارێ پۆلیسێن هەرێما كوردستانێ هۆشداریێ ددەتە وەلاتیێن چەكێ بێ مولەت هەی و ئاشكرا كر، ئێك سال دەلیڤە ب وەلاتیان هاتیە دان چەكێن خۆ یێن نە قانوونی تۆمار بكەن و هژمارا بنگەهێن تۆمار كرنا چەكی هاتینە زێدە كرن بۆ 90 بنگەهان و گۆت: داخوازێ ژ وەلاتیان دكەین لەزێ بكەن بۆ تۆماركرنا چەكێن خۆ یێن بێ مولەت هەر كەسەكێ چەك هەبیت و هەتا بەری 21ی هەیڤا داهاتی چەكێ خوە تۆمار نەكەت دێ پێڕابوونێن قانوونی ل هەمبەر هێنە وەرگرتن.
كارزان ئەمیر، پەیڤدارێ پۆلیسێن هەرێما كوردستانێ دا زانین كو ل گورەی مادێ 15 ژ قانوونا هژمار 2 یا سالا 2022ێ هەر كەسەكێ چەكێ بێ مولەت هەبیت یان چەكی ڤەگوهێزیت و هەر مامەلەكێ ب چەكی بكەت دێ هێتە سزادان ئەو ژی ب دەستەسەر كرن و زیندانی كرنێ بۆ دەمێ ئێك سال هەتا سێ سالان، هەروەسا سزایێن مادی ژی هەنە و چەكێ وەلاتی دێ ب چەكێ قەچاغ هێتە هژمارتن.
كارزان گۆت: (لەوڕا پێدڤیە ئەو كەسێن ژبلی چەكێن ئاگرین چەكێن جەنگی هەنە لەزێ بكەن بۆ رادەستكرنێ، هەر وەلاتیەكێ چەكێ خوە تۆمار بكەت دێ فۆرمەكێ تژی كەت و چەكێ وەلاتی دێ هێتە ڤەگەڕاندن بۆ خودانێ چەكی و پشتی تۆمار كرنێ دێ كۆمەلگەهێن كڕین و فرۆتنا چەكی هێنە ڤەكرن و هەر كەسەكێ چەكێ خوە تۆمار كربیت دشێت چەكێ خوە سەخبێر بكەت و بفرۆشیت، هەروەسا وەلاتی دشێت داخوازەكێ بۆ وەرگرتنا مولەتا هەلگرتنا چەكی تۆمار بكەت و مولەتا فەرمی وەر بگریت).
كارزان ئەمیر گۆتژی: (ب چاڤدێریا وەزارەتا نافخۆ نێزیك دێ ل هەموو پارێزگەه و ئیدارێن سەربخۆ كۆمەلگەهێن مودێرن بۆ كڕین و فرۆتن و سەخبێركرنا چەكی هێنە ڤەكرن، ئەڤەژی د چوارچوڤێ رێنمایێن حوكمەتێ بۆ كۆنتڕۆلكرنا چەكی، بێگومان دێ ئەو كۆمەلگەهە لژێر چاڤدێریا حوكمەتێ بن و بنگەهێ پۆلیسا و ئاگر ڤەمراندنێ و هەموو پێدڤیا دێ تێدا هەبن).
پەیڤدارێ پۆلیسێن هەرێما كوردستانێ كارزان ئاماژە بڤێ چەندێ ژی كر، سالەكێ مولەت ب وەلاتیان هاتیە دان چەكێن خوە رادەست بكەن، هەر كەسەكێ چەكێ خوە تۆمار نەكەت دێ وەكی چەكێ قەچاخ هێتە هژمارتن و هژمارا وی چەكێ هاتیە تۆمار كرن هەتا نوكە وەك پێدڤی نینە، هەشت لیژنە دێ ژلایێ سەرۆكاتیا جڤاتا وەزیران و وەزارەتا نافخۆ هێنە پێك ئینان بۆ دەركرنا مەرجێن دانا مولەتا چەكی و گۆت: (چونكی دێ جورێن مولەتا چەكی هەبن ئێك ژ وان بۆ هەلگرتنا چەكیە و یا دیژی تنێ وەلاتی دشێت د مالدا چەك هەبیت، هەروەسا هندەك كەس هاتینە ئاگەهدار كرن چەكێن گران رادەستی حوكمەتێ بكەن و دێ بەرامبەر رادەستكرنا چەكێ گران هێنە قەرەبوو كرن، ژبەركو رێكێ نادەین چو كەسەكی دەرڤەی قانوونێ چەكێ گران هەبیت).
