پڕۆژەیەك بۆ چارەسەركرنا ئاریشەیا ئەردێ جۆتیاران دهێتە بەرهەڤكرن
پەرلەمانتارەكا پارتی ل پەرلەمانێ ئیراقێ دیار كر، خوەنیشادانا جۆتیارێن كەركووكێ یا بەردەوامە و پارتی ژی دێ پڕۆژەیەكی ل پەرلەمانێ ئیراقێ بەرهەڤكەت، كو بڕیارێن رژێما بەعس بهێنە هەلوەشاندن.
نەجوا كاكەیی، پەرلەمانتارا فڕاكسیۆنا پارتی ل پەرلەمانێ ئیراقێ بۆ رۆژناما ئەڤرۆ دیار كر، ئەڤە چەندین رۆژە خوەنیشادانێن جۆتیارێن كەركووكێ یا بەردەوامە، جۆتیار دبێژن هەتا ئاریشەیا وانا ب ئێكجاری نەهێتە چارەسەركرن دێ بەردەوامبن ل سەر خوەنیشاندانێن خوە، چونكی بەردەوام ئاریشە بۆ جۆتیاران دهێنە چێكرن و هەر جارێ و ب بەهانەیەكێ مەترسی ل سەر جۆتیاران پەیدا دبیت و گۆت: «ئەم وەكی پارتی و نوونەرێن كەركووكێ پشتەڤانیا داخوازیێن جۆتیاران دكەین، چونكی مەترسی ل سەر ئەردێ جۆتیاران هەیە، ب تایبەتی جۆتیارێن كورد و توركومان».
نەجوا كاكەیی گۆتژی: «فڕاكسیۆنا پارتی ل پەرلەمانێ ئیراقێ دێ پڕۆژەیەكی بەرهەڤكەت و پشتی بهێنڤەدانا پەرلەمانێ ئیراقێ دێ پێشكێشی پەرلەمانی كەت و تێدا پەرلەمان دەنگی ل سەر بدەت بۆ هەلوەشاندنا هەموو بڕیارێن سەردەمێ رژێما بەعسا ژناڤچوویی و بەری رژێما بەعس ژی، چونكی ب دەركرنا چەندین بڕیاران ل سەر دەمێ رژێمێ ئەردێ جۆتیاران ل سەر عەرەبێن شۆڤێنی هاتیە بەلاڤكرن و نوكە ئەو عەرەبێن شۆڤێنی داخوازا ئەردێ جۆتیاران دكەن».
