پێشانگەها پیشەسازی و بازرگانی یا كۆمپانی و سەرمایەدارێن ئۆرمیێ ل دهۆكێ دێ هێتە ڤەكرن
ماجد سەید سالح، پارێزگارێ دهۆكێ ب وەكالەت دوهی 3/7/2023 پێشوازی ل سەید خەلیلی، سەرۆكێ ژوورا هەڤكاریێ ل ئورمیێ و ئیسماعیل ئیسماعیلی، ئەندامێ جڤاتا كارگێری یا ژوورا هەڤكاریێ و حسێن یاد، ئەندامێ جڤاتا ناڤبری و محەمەد رزا شوجاعی، سكرتێرێ ژوورا هەڤكاریێ كر.
د هەڤدیتنەكێ دا ب ئامادەبوونا سەرۆكێ ژوورا بازرگانی و پیشەسازی ل دهۆكێ و رێڤەبەرێن وەبەرهێنانێ و پیشەسازی ل دهۆكێ بەحسێ پەیوەندیێن بازرگانی و ئابووری و كلتۆری د ناڤبەرا هەرێما كوردستانێ و دەولەتا ئیرانێ و ب تایبەتی د ناڤبەرا پارێزگەها دهۆكێ و پارێزگەها ئورمیێ دا هاتە كرن.
سەرۆكێ شاندی و ژوورا هەڤكاریێ ل ئورمیێ دیار كر كو سەرمایەدار و وەبەرهێنەر و كۆمپانیێن ئیرانی ل ئورمیێ پێ خوشە پەیوەندیێن خوە یێن ئابووری و بارزگانی و وەبەرهێنانێ ل گەل پارێزگەها دهۆكێ پتر پێشبێخن و ئەوان ل بەرە ل مەها ئیلۆنا ئەڤ سالە پێنجەمین پێشانگەها خوە یا بازرگانی و پیشەسازی ل دهۆكێ ڤەكەن و خواست، كو پارێزگەها دهۆكێ هاریكار و پشتەڤانیا ڤێ پێنگاڤێ بكەت.
پارێزگارێ دهۆكێ ب وەكالەت بناڤێ د. عەلی تەتەر، پارێزگارێ دهۆكێ و كارگێریا پارێزگەهێ خوەشحالیا خوە ب سەرەدانێ دیاركر و بەرهەڤیا پارێزگەهێ و هەموو رێڤەبەریێن پەیوەندیدار نیشا دا بۆ خورتكرنا هەموو جۆرێن پەیوەندیان ل گەل كۆمارا ئیسلامی یا ئیرانێ، نەخاسمە ڤەكرنا پێنجەمین پێشانگەها بازرگانی و پیشەسازی ل دهۆكێ.
