رۆژێن شەمبی ل ناڤەندێن خواندنێ دێ بیتە بێهنڤەدان
دكتۆر ئالان حەمە سەعید، وەزیرێ پەروەردێ ل حوكمەتا هەرێما كوردستانێ دوهی 16/7/2023 د كۆنگرەكێ رۆژنامەڤانی دا ل دهۆكێ دیار كر، رۆژێن شەمبی ل ناڤەندێن خواندنێ یێن حكومی بۆ سالا نوو یا خواندنێ 2023 – 2024 ل هەرێما كوردستانێ دێ بیتە بێهنڤەدان و دەستپێكرنا سالا نوو یا خواندنێ ژی دیار كر.
وەزیرێ پەروەردێ خویا ژی كر، ب كۆیێ دەنگێ ئەندامێن جڤاتا وەزارەتێ بڕیار هاتەدان، رۆژێن شەمبی ل هەمی ناڤەندێن خواندنێ یێن هەرێما كوردستانێ دێ بیتە بێهنڤەدان و ب رێیا گشتاندنەكێ هووركاریێن ڤێ بڕیارێ بۆ هەمی پەروەردێن گشتی و ناڤەندێن خواندنێ دێ هێنە رۆهنكرن.
ل دۆر دەستپێكرنا سالا نوو یا خواندنێ 2023 – 2024 وەزیرێ پەروەردێ گۆت: «سالا نوو یا خواندنێ ل رێككەفتی 13/9/2023 دێ دەستپێكەت و رۆژا 17/9/2023 دێ مامۆستا دەست ب گۆتنا وانان بۆ قوتابیان كەن و سالا نوو یا خواندنێ ژ 170 رۆژان كێمتر نابیت».
ئالان حەمە سەعید، وەزیرێ پەروەردێ ئاشكرا ژی كر، ئێك ژ مفایێن گرنگ یێن ڤێ بڕیارێ بۆ مامۆستایان ل شوونا شەش رۆژان دێ پێنج رۆژان د حەفتیێ دا دەوامێ كەن و هاتنوچوون ژی دێ كێم بیت.
