حوكمەتا هەرێمێ هەژمارەكا پڕۆژەیان ل پەرسگەها لالش ئەنجامداینە
سەرپەرشتی پڕۆژەیێ نووژەنكرنا پەرستگەها لالش دیار كر، حوكمەتا هەرێما كوردستانێ ب گوژمێ پتر ژ دو ملیار دیناران پڕۆژە ل پەرستگەها لالش ئەنجامداینە و بەردەوام پڕۆژە ل لالش بجه دئینیت.
خالد نەرمۆ، سەرپەرشتی پڕۆژەیێ نووژەنكرنا پەرستگەها لالش بۆ ئەڤرۆ خویا كر، كابینا نەهێ یا حوكمەتا هەرێما كوردستانێ گەلەك گرنگی دایە خزمەتكرنا پەرستگەها لالش و چەندین پڕۆژە لێ بجهئیناینە و گۆت: «د كابینا نەهێ دا باشترین كارگەها چێكرنا زەیتا زەیتونان ل پەرستگەها لالش هاتیە چێكرن».
زێدەتر گۆت: «پرۆژەیێ ئاڤێ و جۆتساید و دەرگەهێ پەرستگەها لالش هاتنە بجهئینان، ئانكو كابینا نەهێ یا حوكمەتا هەرێمێ ب گوژمێ پتر ژ دو ملیار دیناران پڕۆژە ل پەرستگەها لالش ئەنجامداینە و كارێ نووژەنكرن و سەخبێریا پەرستگەها لالش یێ بەردەوامە».
