ب درێژاهیا زێدەتر ژ 243 كیلۆمەتران جادە ل زاخۆ دهێنە چێكرن
سەرۆكێ باژێرڤانیا زاخۆ دیار كر :» مەسرور بارزانی، سەرۆكێ حوكمەتا هەرێما كوردستانێ پشتی سەرەدانا زاخۆ كری گەلەك پرۆژە راگەهاندن و بەردەوام پرۆژە ل زاخۆ یێ هێنە بجهئینان، هەر كەسەكێ سەرەدانا زاخۆ دكەت مەندەهوش دبیت ژ بەر پیشكەفتنا ل زاخۆ پەیدابووی د وارێ خزمەتگوزاری دا «.
یونس مەحمەد، سەرۆكێ باژیرڤانیا ئیدارا سەربەخۆیا زاخۆ راگەهاند: «گەلەك گوهۆرینەكا مەزن ل زاخۆ چێبوویە و هژمارەكا مەزن یا جادا هاتینە چێكرن، وەكو جادا تاخێ ئەردەوان و جادا تاخێ ئەیاز و تلكبەر و گولان و جەگەرخوین و جادا تاخێ بێدار و پێشمەرگەه و جادا كوردستان و جادا تۆنیلا زاخۆ، ئەڤ جادە ب درێژاهیا 208 كیلۆمەتران هاتینە چێكرن دگەل چاندنا داروبارێ و سولینێن ئاڤرێژ ب درێژاهیا 23 كیلۆمەتران هاتینە چێكرن ل سەر بۆدجەیا حوكمەتا هەرێما كوردستانێ«.
ئاشكرا كر:» ل سەر بۆدجەیا ئێدارا سەربەخۆیا زاخۆ ژی چەندێن پرۆژە هاتینە بجهئینان ل تاخێ تلكبەر و تاخێ هێزل و زاگرۆس و پێشمەرگەه و مهاباد و گولان و سەنتەرێ باژێرێ زاخۆ ب درێژاهیا 35 كیلۆمەتران جادا هاتینە چێكرن و سولینێن ئاڤرێژ ب درێژاهیا 17 كیلۆمەتران دهێنە چێكرن و ئەڤ پرۆژە دێ ل ڤان رۆژان دەست پێ هێتە كرن».
تەكەستكر: رێژا كەسكاتیێ ژی ل زاخۆ هاتیە زێدەكرن رۆژانە ژی داروبار هێنە چاندن و سەخبێریا باخچەیان دهێتە كرن پتر ژ 25 باخچەیان ل زاخۆ هەنە و پاركا شەهیدان دناڤ سەنتەرێ زاخۆ دایە و پاركەك ل تاخێ عەباسیكێ ژی دهێتە چێكرن و پاركەكا مەزن ل نێزیك مزكەفتا رەحمان هەیە گەلەك پارك هەنە».
