بیرەوەریا 40 سالیا جینۆسایدكرنا بارزانیان ب فەرمی ناهێتە ساخكرن
ئەڤ سالە بۆ بیرەوەریا 40 سالیا جینۆسایدكرنا هەشت هزار بارزانیان ل سەر گورستانا جینۆسایدكریان چو رێورەسمێن فەرمی ناهێنە ئەنجامدان.
رێبوار رەمەزان بارزانی، رێڤەبەرێ شەهید و ئەنفالكریان ل بارزان بۆ ئەڤرۆ راگەهاند: ئەڤ سالە ل بیرەوەریا جینۆسایدكرنا هەشت هزار بارزانیان، كو دكەڤیتە 31/7 چو رێورەسمێن فەرمی ل گۆرستانا جینۆسایدكریێن بارزان ناهێنە ئەنجامدان.
ل دۆر ئەگەرێ ئەنجام نەدانا رێورەسمێن فەرمی رێبواری گۆت: «ئەڤ سالە گەلەك رێورەسم ل دەڤەرا بارزان، تایبەت ڤەكرنا مۆزەخانا نیشتمانیا بارزانی هەبوون، هەموو مێهڤانان تاجە گولینە ل سەر مۆنۆمێنتا شەهیدێن جینۆسایدێ دانا، لەورا ژی ئەڤ سالە ب فەرمی رێورەسم نابن، ب تنێ ل سەر ئاستێ ناڤخوەیی دێ كەسوكارێن شەهیدێن جینۆسایدكریان سەردانا گۆرستانێ كەن».
