ل سەر ڕاسپاردەیا مەسرور بارزانی جاددەیێن هەموو تاخێن زاخۆ دێ هێنە قێركرن
زاخۆ، دلۆڤان هالۆ:
ل سەر راسپاردێن مەسرور بارزانی، سەرۆكێ حوكمەتا هەرێمێ هەمی جاددەیێن هەمی تاخ و گەڕەكێن زاخۆ دێ هێنە قێركرن، دیسا ب مەرەما پتر خزمەتكرنا كەرتێ گەشتیاری ل دەڤەرێ ب گوژمێ پتر ژ شەش ملیۆن دۆلاران بەرێ بنیاتی بۆ پڕۆژەیەكێ گەشتیاری ل زاخۆ هاتە دان.
شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر كو دوهی 25/7/2023 ل ژێر چاڤدێریا گۆهدار شێخۆ، سەرپەرشتێ ئیدارەیا سەربخوە یا زاخۆ، ب گوژمێ 21 ملیار و 850 ملیۆن دیناران بەرێ بنیاتی بۆ پڕۆژەیێن جاددەیێن تاخ و گەڕەكێن مللی یێن تاخێن (هیزل، پێشمەرگە، زاگرۆس، مهاباد، دەشتمرێ، گۆلان قووناغا دویێ، تلكەبەر…هتد) دگەل سۆلین و ئاڤڕێژێن و هێلێن كارەبێ هاتە دانان.
گۆهدار شێخۆ، د پەیڤەكێ دا گۆت: «ئەڤ پڕۆژە ل سەر ڕاسپاردەیێن مەسرور بارزانی، سەرۆكێ حوكمەتا هەرێما كوردستانێ یە، كو جاددەیێن هەموو تاخ و گەڕەكێن سنوورێ ئیدارەیا سەربخوە یا زاخۆ دێ هێنە قێركرن، ب تایبەت تاخێن مللی و هەژارنشین».
دیسا هەر دوهی و ل سەر ڕاسپاردەیێن مەسرور بارزانی، سەرۆكێ حوكمەتا هەرێما كوردستانێ، و ب مەرەما گرنگیدان ب كەرتێ گەشتوگوزاری، ل ژێر چاڤدێریا گۆهدار شێخۆ، سەرپەرشتێ ئیدارەیا سەربخوە یا زاخۆ و ب ئامادەبوونا دكتۆر محەمەد شۆكری، سەرۆكێ دەستەیا وەبەرهێنانێ ب گوژمێ شەش ملیۆن و 100 هزار دۆلاران بەرێ بنیاتی بۆ پڕۆژەیێ وەبەرهێنانێ یێ گەشتوگوزاری ل سەنتەرێ زاخۆ یێ بناڤێ (تۆگا پۆرتو مارینا) هاتە دانان
شڤان عەبدی گۆت: «ئەڤ پڕۆژە تەمامكەرێ پڕۆژەیێ گەشتیاری یێ پرا دەلالە و ئەڤ پڕۆژە ژ 54 كۆشكێن ب ڕێكوپێك و جوان، كافیتیریا، خوارنگەهـ، یاریێن زاڕۆكان، یاریا زیپ لاین، كو دەربازی خابووری دبیت و زێدەباری سواربوونا گەمیان پێك دهێت و دێ ب سەدان دەلیڤەیێن كاری ل دەڤەرێ پەیداكەت».
