وەلاتێن ئه‌فریقیا خوه نێزیکی رۆسیا دکه‌ن
ب، سه‌رجان مەحمود:
سەرۆکێ رۆسیا ل گەل سه‌رۆک و سه‌رۆک وه‌زیرێن 41 وه‌لاتێن ئه‌فریقیا د کۆنفرانسەکێ دا پشکدار بوون، د هەمان کۆنفرانسێ دا د ناڤبه‌را رۆسیا و 41 وه‌لاتێن ئه‌فریقیا د بیاڤێن ئابووری، بازرگانی، وزێ و ئێمناهیێ دا په‌یمانێن مه‌زن هاتنە ئیمزه‌کرن، ڤیلاده‌میر پۆتین سه‌رۆکێ رۆسیا، د کۆنفرانسێ دا راگه‌هاند کو ئەو وەک رۆسیا د بەرهەڤن د گەلەک بیاڤان دا ب تایبەتی ژی د بیاڤێ خوراکی دا هاریکاریا وەلاتێن ئەفریقیا بکەن و گۆت: (ئه‌مریکا و که‌دخوارێن ئۆرۆپا ب سه‌دان سالە زۆرداریێ ل گه‌لێن ئه‌فریقیا دکەن و به‌رده‌وام هه‌ول دده‌ن خێر و بێرێن ئه‌فریقیا ژ بۆ وه‌لاتێن خوه ڤه‌گوهێزن. ئه‌ز دوپات دکم کو ئه‌م وه‌ک رۆسیا ئامادەینە پرسگرێکێن خۆراکێ چارەسەر بکەین).
د ڤێ مژارێ دا نڤیسه‌ر و رۆژنامه‌ڤانێ ناڤدار یێ تورکیا فه‌هیم تاشته‌کین ژی راگه‌هاند، پۆتینی دڤێت ئه‌و زیانێن کو ژ به‌ر شه‌رێ ل ئۆکرانیایێ ل ئابووریا رۆسیا که‌فتیه ب بازار و سوکا نوو یا ئه‌فریقیا سه‌رەراست بکه‌ت و گۆت: (وه‌لاتێن ئه‌فریقیا ژ به‌ر کریارێن به‌رێ یێن وه‌لاتێن فره‌نسا، بریتانیا و وه‌لاتێن دی یێن ئۆرۆپا، ناخوازن ل گەل وان کار بکەن و ژ به‌ر ڤێ یه‌کێ به‌رێ خوه داینە رۆسیا).
