1991 گه‌له‌ك شاندێن به‌ره‌ی كوردستانی چوونه به‌غدا و كه‌سه‌ك ب ناڤێ چو حزبا نه‌چوو به‌غدا
دیدار، سالار محەمەد دۆسكی:
٢-٢
هوشەنگ باوانی زێدەتر گۆت: كۆمبوونێن بەرەیێ كوردستانی بوچوونێن جودا جودا یێن هەڤدژ سەبارەت پاشەرۆژا ئیراقێ و مانا بەعسیان ل سەر دەستهەلاتێ هەبوون، وی دەمی (بەریێ كوردستانی) ژ ڤان حزب و ئالیان پێگهاتبوو، (پارتی ، ئێكەتی ، سوشالیت، پارتی گەل ، حزبا شیوعی، پاسۆك) ئاڤان حزبا ل سەر ئاستێ كەسێن هژمارە ئێك كمبوونێن خوە ئەنجامددان، دووڤدا سازیێن بەریێ كوردستانی هاتنە دروستكرن، سەركردایەتیا سیاسی هەر ژ كەسێن هژمارا ئێك هاتبوو پێكئینان، هەر دوێ كۆمبوونێ دا بڕیارا هاتە دان جەنابێ سەرۆك (مەسعود بارزانی ) وەك سەرۆك و رێنیشاندەر و سەركێشێ بەرەیێ كوردستانی بیت ل كوردستانێ، و خودێ ژێ رازی (مام جەلال) ژ سەرۆكێ بەرەیێ كوردستانێ بیت ل دەرڤەیی كوردستانێ، و هەر ئێك ژوانا ستاف و تیما خوەیا تایبەت هەبوو، سازییا دوێ یا بەریێ كوردستانی مەكتەبا تەنفیزی بوو كو هەر پارتەكا ئەندام د بەرەیێ كوردستانێ ئەندامێ خوەیێ تایبەت دمەكتەبا تەنفیزی دا هەبوو،( فرەنسۆ حەریری، جەبار فەرمان ، قادر جەباری، ئەبو حكمەت، میلازم شوان، هۆشەنگ باوانی) ، هەمی دوشەمبی و چوارشەمبییا ل بارەگایێ بەرەیێ كوردستانی ل (راژان) كومبوونێن مەكتەبا تەنفیزی دهاتنە ئەنجامدان، ئەركێ مە دوڤچوونا كاودانان و دروستكرنا راپۆرتێن ناڤخوە و دەرڤە ژی دهاتن، مەكتەبا تەنفیزی كارێ وێ ڤەكولین و خواندنا راپۆرتان و بەرهەڤكرنا راپۆرتەكا پوختە و جوان بوو كومبوونا سەركردایەتییا سیاسی، هەروەسا دەستەیا ڕاگەهاندنێ ژی هەبوو و رۆژنامەك بناڤێ بەرەیێ كوردستانی دەردئێخست، و هەر پارتەكێ نوونەرەكێ خوە تێدا هەبوو، كو پێكهاتبوو ژ ( فەهیم عەبدوللا حمۆ، ئەرسەلان باییز، هوگر) و چەند هەڤالێن دیتر و رۆژنامە یا نیڤ هەیڤانەبوو بناڤێ (بەرەیێ كوردستانێ) دهاتە بەلاڤكرن، براستی رۆلەكێ گرنگ د پێشئێخستنا پرۆسا رۆژنامەگەریا كوردی دا هەبوو، ئەو پەرێ دیموكراسیی بوو وی دەمی وەك كادرەكێ د ڕاگەهاندنێ دا كاركری، من هەست ب ئازادیا ڕادەربڕینێ و سەربەستییا بوچوونان دكر، و پێنوس گەلەكێ ئازاد بوو، باوەر بكە یا بێ سنۆر بوو دئازادیا نڤیسینێ دا، رەخنە و گازندە بشێوەكێ ڕاستوخوە ل سەركردایەتیا شۆرەشێ دهاتنە نڤیسین و گرتن، هندەكان بابەت بۆ رۆژنامێ دنڤیسین ئەندامێن چو پارتی و ئالیان نەبوون، و كەسێن بێ لایەن و سەربخوە بوون، و كەسێن نشتیمان پەروەر بوون، ئەو رۆژنامە هەتا 200 دانە ژێ هاتنە چاپكرن و بەلاڤكرن، كاودان زۆر بەرتەنگبوون لێ ئەز باوەرم رۆژنامە دگەهشتە هەموو باژێران.
ئەندامێ مەكتەبا تەنفزییا بەرەیێ كوردستانێ یێ بەرێ دووپاتكر: بەرەیێ كوردستانی ژ سێ سازییان پێك دهات، سەركردایەتییا سیاسی، مەكتەبا تەنفیزی، ڕاگەهاندن، دووڤدا كار هاتە كرن بۆ ئێكگرتنا سازیێن دی یێن كوردستانی وەك ( رێكخراوێن پیشەیی و جەماوەری)، ل وی دەمی مە پێشنیار كر، كو ب شێوەكێ گشتی ئەو رێكخراوە ببنە ئێك یان بخوە بەرەیەكی دروست بكەن، ئێك ژ دەستكەفتێن بەرەیێ كوردستانێ ئێكگرتنا (ئێكەتیا نیڤیسەران ) بوو، دو چەق بوون بەرەیێ كوردستانی شیا كونگرەیێ ئێكگرتنێ بۆ دروست بكەت و مە خواست هەموو هەڤبگرن.
هوشەنگ باوانی هەروەسا گۆت: دەمێ حكومەتا بەعس چوویە د ناڤا وەلاتێ كوێتێ دا، جەنابێ سەرۆك بارزانی برۆسكەك هنارت وبڕیار دا بارەگایێ مەكتەبا تەنفیزییا بەرەیێ كوردستانی ژ ( راژان ) بهێتە ڤەگوهاستن بۆ (قاسمە رەش) نێزیكی دەڤەرا پشدەرێ كو دناڤ ئاخا كوردستانێ دا بیتن، كۆمبوونێن بەرەیێ كوردستانی رۆژانە دەستپێكرن و سەركردایەتییا سیاسی ل دەرڤە و ناڤخوە كۆمبوونێن وانا گەلەك دگەرم بوون، و مە هەستپێكر بەرهەڤی بوو كارەكێ گەلەكێ مەزن دهێتە كرن، ل دووماهی كۆمبوون بڕیار هاتە دان كو سەرهەلدانەكا سەرانسەری دێ ل دەڤەرێ پەیدا بیت، و پشتەڤانیەكا دەرڤە ژی بۆ بابەتی هەیە، و گرنگە بەر ب قۆناغەكا دییا شۆرەشێ بچین، شۆرەشا مەدەنی و شۆرەشا باژێری، سەركردایەتییا ڤێ سەرهەلدانێ (بەرەیێ كوردستانی) بوو، ب سەرۆكاتیا (مەسعود بارزانی) 5 /3/ 1991 كومەلگەه و باژێركێن دەوروبەرێن ڕانیێ قەزا ڕانیێ ژی هاتنە ئازاد كرن، مەفرەزێن پێشمەرگەێ بەرەیێ كوردستانی هاتنە دناڤا كوردستانێ دا و ل گەل جەنابێ سەرۆك بارزانی هاتنە كوردستانێ.
باوانی زێدەتر خوەیاكر: بەرەیی كوردستانی بنیاتێ پەرلەمان و حكومەتا كوردستانێ بوویە، دەمێ جەنابێ سەرۆكی گۆتارا پشتی سەرهەلدانێ ل قەزا كویێ خواندی، ئاماژەدا كو ئێدی بلا بەس بیت سازیێن چیا و ئەم پێدڤی ب سازیێن دەولەتێ ینە و ل سەر بڕیارا جەنابێ سەرۆكی هەلبژارتنێن سالا 1992 ێ هاتنە ئەنجامدان.
هۆشەنگ باوانی ئەو چەندە ژی پشتراست كر، دەمێ حكومەتا بەعس ل كۆڕێ شەكەستین، ئێدی گەهشتنە وێ باوەریێ، كو چو رێك نینە بتنێ دڤێت دانوستاندن هەبیت، رێكا شەڕی و دەبابان ب دووماهی هات، وی دەمی جەنابێ سەرۆكی كۆمبوونەكا بلەز یا بەرەیێ كوردستانی ل گوندێ (سارداوێ ) نێزیكی ( دیانا) ئەنجامدا، دوێ كۆمبوونێ دا ئەز بەرهەڤبووم و لژنەك هاتە پێكئینان بناڤێ (لژنا پشتەڤانیا بەرەیێ جەنگ) ئەز ژی ئەندامێ وێ لژنێ بووم، كو پێكهاتبوون ژ ( كەریم شنگالی، محەمەد مەنگوری، مامۆستا موحسن و ئەز ) و گەلەك ب رژی كاردكرن و هەر تشتەكێ مە دەستەسەر كربا دا هێتە ڕەوانەكرن بۆ ( كۆڕێ ) هەر تشتێ هەبا (چەك، كەلوپەلێن ناڤ مالێ ترۆمبێل) مە نەدهێلا ژ سنۆری دەرباز ببیت و ڤێ لژنێ رۆلەكێ گرنگ دگێرا دشەرێ كۆڕێ دا.
باوانی زێدەتر دبێژیت: گەلەك شاندێن بەرەیێ كوردستانی بۆ گەنگەشێ دچوونە بەغدا و هەمی بناڤێ بەرەیێ كوردستانی بوون، كەسەك بناڤێ چو حزب و ئالیان نەدچوون دانوستاندنێ ل گەل بەغدایێ بكەن، بەرەیێ كوردستانی پرۆژە هەبوو و چو پارتان پرۆژیێ تاك ڕەویا حزبی نەبوو، بتنێ پرۆژەیێ بەرەیێ كوردستانی بوو، حكومەتا بەعس ژی یا ڕاست نەبوو ل گەل كوردان و گەلەك گازندە دكرن كا بۆچی كورد گەلەك درێژەپێدانێ ددەنە گەنگەشێ ل گەل حكومەتێ. سەركرداتییا كوردان دزانی ئەڤ دەستهەلاتا بەعسی نامینیتن، و هەردەم كورد دهاتنە پێناسەكرن كو شەڕخوازن، وی دەمی جەنابێ سەرۆك بارزانی گۆتی: دێ بۆ وانا دیار كەین ئەم نەشەڕخوازین ئەم ئاشتی خوازین و ئەڤە گەلەك یا گرنگ بوو، گەلەك شەڕێ ڕاگەهاندنێ و دەرونی ژی ل گەل مە دهاتە كرن، رۆژنامە هەبوون دگۆتن پێكهاتن و سوبەهی دێ بەیان هێتە بەلاڤكرن، وئەڤە هەمی چێ نەبوو و حكومەتا بەعس نەشیا بەردەوام بیتن، ئەمریكا ژی پرۆژەیێ خوە هەبوو بۆ ژناڤبرن و هەڕفاندنا حكومەتا بەعس.
ل دووماهیێ هۆشەنگ باوانی گۆت: پاراستنا هەرێما كوردستانێ ئەركەكێ نشتیمانیی یە و نەئەركەكێ حزبی یە وحزبا بەرژوەندیێن خوە هەنە، ئەڤە بەرژوەندیا مللەتەكی یە، باشترین پرۆسە بۆ پاراستنا كوردستانێ ئێكگرتنا مللەتێ كوردە، خوش بیت یان نەخوش بیت، دڤێت ئێك رێزی هەبیت، ژبلی كارتا پاراستنا هەرێمێ دڤێت مە كارتا پێشڤەبرنا هەرێما كوردستانێ ژی هەبیت، خوە هەتا هەاتیێ ئەم دچارچۆڤێ فێدرالیێ دا نابین، و هەتا هەتایێ ئەم ب هیڤیا بوودجە و مووچەیێ دەولەتێ ڤە نابین، دڤێت بەر ب سەربخوەیا كوردستانێ ڤە بچین، روویەكێ ئاشتخوازی هەبیت و تێكدان نەبیت، ئێك رێزی نەیا ب زحمەتە، هەكە نیازێن پاك و كوردینی هەبن، چونكی هەكە نەبینە ئێك باوەر بكەن، دوژمنێن نەئێكگرتن و نەئێكرێز ییێ زێدەترن ژ دوستێن ئێكڕێزیێ.
