داعش جارەکا دی ل سووریێ یا بهێز دکەڤیت
رۆژنامەیەکا ئەمریکی ئاماژە ب هندێ کریە، دەمەکە ل حەمێ و هندەک دەڤەرێن دی یێن سووریێ رێکخستنا تیرۆرستی یا داعشێ بهێز کەفتیە و ئێرشی سەربازێن سووریێ دکەت و بەری دو رۆژان ژی ل باژێرێ حەمیێ حەفت سەربازێن سووریێ ب دەستێ چەکدارێن داعشێ هاتینە کوشتن.
رۆژنامەیا واشنتۆن پۆست یا ئەمریکی د راپۆرتەکێ دا ئاماژە ب هندێ کریە، ژ بەر ئالۆزیێن نها ل سووریێ و ناکۆکیێن د ناڤبەرا تورکیا و رۆسیا دا و هەروەسا ئەمریکا ل گەل ئیرانێ و ئالیێن دی وەسا کریە رەوشا سووریێ پتر ئالۆز ببیت و ئەو یەک ژی بوویە ئەگەرێ سەرەکی جارەکا دی رێکخستنا تیرۆرستی یا داعشێ مفای ژ وان ناکۆکیان وەربگریت و پێگەهێ خوە ل هندەک دەڤەرێن ستراتیژی ل سووریێ بهێز بکەت، ب تایبەتی ژی نها ل باژێرێ حەمیێ داعشێ دەست ب چالاکیان کریە و هەری دووماهیێ ژی بەری دو رۆژان چەکدارێن رێکخستنا تیرۆرستی یا داعشێ ئێرشی سەربازێن سووریێ کرینە و د ئەنجاما ئێرشا چەکدارێن داعشێ دا حەفت سەربازێن سووریێ هاتینە کوشتن و گەلەک سەرباز ژی بریندار بووینە، نها ل گەلەک دەڤەرێن حەمایێ داعش هاتنوچوونێ دکەن و خوە بۆ کریارێن تیرۆرستی بەرهەڤ دکەن.
هەمان رۆژنامەیێ ئەو یەک ژی دیار کریە، ئالۆزیێن نها ل سووریێ هەکە وەسا بەردەوام بن ئەو یەک دێ بیتە ئەگەرێ هندێ داعش جارەکا دی ئێرشی باژێران و خەلکێ سڤیل بکەت، دێ جارەکا دی گەلەک کەس بنە قوربانی، ژ بەر هندێ ژی ژ بۆ نەمانا داعشێ دڤێت هەم هەڤپەیمانیا نێڤدەولەتی یا شەڕێ ل دژی داعشێ جارەکا دی خوە ب هێز بکەت و هەم ژی دڤێت ئەمریکا و رۆسیا پێکڤە سەبارەت ب نەمانا داعشێ ل سووریێ کار بکەن، چونکی ناکۆکیێن نها د ناڤبەرا رۆسیا و ئەمریکا دا بووینە ئەگەرێ بهێزبوونا داعشێ و ئەو یەک ژی دشێت مەترسیێن خوە یێن گەلەک مەزن بۆ پاشەرۆژا سووریێ، ئیراقێ و وەلاتێن دی یێن رۆژهەلاتا ناڤین و هەتا ئۆرۆپا ژی هەبیت.
چاڤدێرێن سیاسی ژی دیار دکەن، ئەمریکا نەڤێت ب چو رەنگەکێ رێکخستنا تیرۆرستی یا داعشێ ل سووریێ ژناڤ بچیت، چونکی ژناڤچوونا داعشێ ژ بۆ ئەمریکا باش نینە، ئەمریکی هەر رۆژ دبێژن ئەو ژ بەر شەڕێ ل دژی داعشێ ل سووریێ نە، هەکە داعش نەما وی دەمی دڤێت ئەمریکا ژ سووریێ دەرکەڤیت، کو ئەمریکا نها ب چو رەنگەکێ بەرهەڤ نینە هێزێن خوە ژ سووریێ ڤەکێشیت، ژ بەر هندێ بهێزبوونا داعش ل سووریێ تشتەک چاڤەرێکری یە.
