ب گوژمێ هەشت ملیار دیناران پڕۆژەیێن ساخلەمیێ ل زاخۆ دهێنە بجهئینان
دهۆك، لەزگین جوقی:
رێڤەبەرێ گشتی یێ ساخلەمیا ئیدارا سەربخوە یا زاخۆ دیار كر، ب گوژمێ هەشت ملیار دیناران پڕۆژەیێن ساخلەمیێ ل ئیدارا سەربخوە یا زاخۆ د وارێ بجهئینانێ دانە و دبێژیت: پلان هەیە پتر پڕۆژەیێن ساخلەمیێ ل زاخۆ بهێنە بجهئینان.
د. سیروان ئەحمەد، رێڤەبەرێ گشتی یێ ساخلەمیا ئیدارا سەربخوە یا زاخۆ بۆ رۆژناما ئەڤرۆ خویا كر، حوكمەتا هەرێما كوردستانێ گرنگیەكا مەزن ب كەرتێ ساخلەمیێ ل زاخۆ دایە، نوكە ب گوژمێ هەشت ملیار دیناران هەژمارەكا پڕۆژەیێن ساخلەمیێ د وارێ بجهئینانێ دانە، ژ وان: ب گوژمێ چار ملیار و 500 ملیۆن دیناران نەخۆشخانەكا 40 تەختی ل دەڤەرداریا باتیفا دهێتە ئاڤاكرن.
د. سیروان گۆت: «نەخۆشخانا زارۆكان ب گوژمێ دو ملیار دیناران ل زاخۆ یا دهێتە دروستكرن و نەخۆشخانا بێدارێ ب گوژمێ پتر ژ 500 ملیۆن دیناران یا دهێتە نووژەنكرن و بنگەهەكێ ساخلەمیێ ب گوژمێ پتر ژ 600 ملیۆن دیناران یێ دهێتە دروستكرن».
گۆتژی: «پشكا چارەسەریا نەخوشیا پەنجەشێرێ و چاڤدێریا چڕ و پشكا سۆتن و جوانكاریێ بۆ خزمەتكرنا نەخۆشان ل زاخۆ هاتینە چێكرن و د پلانێ دایە پتر پڕۆژە بۆ خزمەتكرنا وەلاتیان بهێنە دروستكرن».
