نەخۆشخانەیەكا دەروونی ل دهۆكێ دێ هێتە ڤەكرن
بڕیارە سێ نەخۆشخانێن دەروونی بهێنە ڤەكرن و بەرپرسەكێ وەزارەتا كاروبارێن جڤاكی ژی دبێژیت: ئێك ژ وان نەخۆشخانەیان ل دهۆكێ دێ هێتە ڤەكرن و هەرسێ نەخۆشخانە دێ تایبەت بن بۆ نەخۆشێن ئافرەت یێن نەخۆشیێن دەروونی هەین.
فوئاد سەدیق، شیرەتكارێ وەزارەتا كاروبارێن جڤاكی بۆ رۆژناما ئەڤرۆ دیار كر، ب مەرەما كۆمكرن و چارەكرنا وان كەسێن نەخۆشیێن دەروونی هەین، بڕیار هاتیەدان سێ نەخۆشخانێن دەروونی ل هەولێر و دهۆك و سلێمانیێ بهێنە ڤەكرن و گۆت: «هەرسێ نەخۆشخانە دێ تایبەت بن ب وەرگرتنا نەخۆشێن ئافرەت یێن نەخۆشیێن دەروونی هەین، نوكە ل دهۆك و هەولێرێ ئاڤاهیێ نەخۆشخانەیێن دەروونی هاتینە بەرهەڤكرن، بەلێ وەزارەتا ساخلەمیێ مژوولی بەرهەڤیانە، كو مەرجێن نەخۆشخانێ تێدا هەبن».
فوئاد سەدیق گۆتژی: «ب تنێ نەخۆشێن ئافرەت دێ هێنە وەرگرتن، چونكی بەری نوكە نەخۆشخانێن دەروونی بۆ زەلامان هەبووینە، هەر ئافرەتەكا نەخۆشیا دەروونی هەبیت بۆ نەخۆشخانا دەروونی دێ هێتە هنارتن، ب تایبەتی ئەو نەخۆشێن بووینە دیمەنەكێ نەشرین ل بازاڕ و جهێن گشتی و بێ كەس ماین ل ڤان نەخۆشخانان دێ هێنە نڤاندن».
