ئسرائێلێ جارەکا دی ئێرشی شامێ کر
دەزگەهێن راگەهاندنا عەرەبی دیار دکەن بەری دو شەڤان فرۆکێن شەڕی یێن ئسرائیلێ ل شامێ ئێرشی چەندین بنگەهێن سەربازی کرینە و د ئەنجاما ئێرشێ دا چار سەربازێن سووریێ جانێ خوە ژ دەست داینە و گەلەک سەرباز ژی بریندار بووینە و زیانێن مەزن گەهشتینە بنگەهێن سەربازی یێن سووریێ.
فەرماندارەکێ ئسرائیلێ ژی بۆ ئاژانسا رویترز دیار کریە، هەتا هێزێن ئیرانێ ل شامێ بن و پیلانان ل دژی وەلاتێ وان بگێرن ئەو دێ ب توندی بەرسڤا ئیرانێ و هێزێن سەر ب وێ ڤە دەن، چونکی ئیرانێ دڤێت ئاخا سووریێ بۆ مەرەمێن خوە ل دژی ئسرائیلێ بکار بینیت و ئەو یەک ژی ژ ئالیێ ئسرائیلێ ڤە ناهێتە قەبوول کرن.
ئەو یەک د دەمەکێ دایە کو د چەند سالێن بۆری دا، ئسرائیل بەردەوام ئێرشی شامێ و دەوروبەرێن وێ دکەت، د ئەنجاما ئێرشێن چەند سالێن بۆری ل شامێ و دەوروبەرێن وێ دا هەتا نها گەلەک ئەفسەرێن ئیرانێ ژی جانێ خوە ژ دەست داینە.
