ل تورکیا کار بۆ ئاڤاکرنا پارتەکا نوو دهێتە کرن
بسپۆرەکێ کاروبارێن سیاسی یێ تورکیا راگەهاند، سەرۆکێ باژێرڤانیا مەزن یا ئستەنبۆلێ بەرهەڤیان بۆ ئاڤاکرنا پارتەکا نوو یا سیاسی ل تورکیا دکەت، چونکی باوەریا وی ب سیاسەتا نها یا پارتا کۆماریا گەل نینە و وی دڤێت ب ئاڤاکرنا پارتەکا نوو ب رەنگەکێ بهێز دەست ب خەباتا سیاسی ل تورکیا بکەت.
د. ئەرای کوچلوئەر بسپۆرێ کاروبارێن سیاسی راگەهاند، ئەکرەم ئیمام ئۆغلۆ سەرۆکێ باژێرڤانیا مەزن یا ئستەنبۆلێ بەری دەمەکێ نەرازیبوونا خوە ل هەمبەر رەوشا نها یا پارتا کۆماریا گەل دیار کریە، وی داخواز ژ کەمال کلچدار ئۆغلۆ کربوو کو دەست ژ سەرۆکاتیا (جەهەپێ) بەردەت، چونکی ل گۆر باوەریا ئیمام ئۆغلۆ سەرۆکێ نها یێ پارتا کۆماریا گەل نەشێت چو گوهۆڕینان بکەت و پێدڤیا جەهەپێ ب سەرۆکەکێ نوو هەیە، لێ ئەو یەک ب توندی ژ ئالیێ کلچدار ئۆغلۆیی ڤە هاتە رەتکرن و ژ بەر هندێ ژی سەرۆکێ باژێرڤانیا مەزن یا ئستەنبۆلێ ژ سەرۆکێ نها یێ جەهەپێ توورە یە و بەرهەڤیان دکەت پارتەکا نوو یا سیاسی ل تورکیا ئاڤا بکەت.
ناڤهاتی بۆ دەزگەهێن راگەهاندنا تورکیا ئەو یەک ژی دیار کر، نها ئەکرەم ئیمام ئۆغلۆ خوەدان جەماوەرەک گەلەک باشە، د ناڤ جەهەپێ دا ژی گەلەک کەس پشتەڤانیێ لێ دکەن، پشتی شکەستنا جەهەپێ د هەلبژارتنێن سەرۆک کۆماریێ و پەرلەمانی دا، پڕانیا ئەندامێن سەرکردایەتیا پارتیا کۆماری داخواز ژ کەمال کلچدار ئۆغلۆ کربوون کو دەست ژ سەرۆکاتیا جەهەپێ بەردەت دا ئەکرەم ئیمام ئۆغلۆ ببیتە سەرۆکێ جەهەپێ، لێ ئەو یەک ژ ئالیێ کلچدار ئۆغلۆیی ڤە ب توندی هاتە رەتکرن، ژ بەر هندێ ژی پشتی هەلبژارتنان هژمارەک بەرچاڤ ژ سەرکردێن جەهەپێ دەست ژ سەرۆکاتیا وێ پارتیێ بەردان و نها ژی ناکۆکیێن گەلەک مەزن د ناڤبەرا ئیمام ئۆغلۆ و کلچدار ئۆغلۆیی دا هەنە.
ناڤهاتی ئەو یەک ژی دیار کریە، جەهەپە د رەوشەکا گەلەک خراب دایە، باوەریا ئەندام و سەرکردێن وێ پارتیێ ب کلچدار ئۆغلۆیی نەمایە، ئەو وەسا دبینن ئێدی کلچدار ئۆغلۆ نەشێت جەهەپێ ژ رەوشا نها قورتال بکەت و دڤێت دەست ژ سەرۆکاتیێ بەردەت.
چاڤدێرێن سیاسی ژی دیار دکەن، هەکە ئەکرەم ئیمام ئۆغلۆ پارتەکا نوو یا سیاسی ل تورکیا ئاڤا بکەت، ئەو یەک دێ بیتە ئەگەرێ لاوازیا پارتیا کۆماریا گەل، چونکی نها پارتیا کۆماری د قەیرانەکا مەزن دایە و ب ئاڤاکرنا پارتەکا وەسا دێ پشکەک مەزن ژ کادیر و جەماوەرێن جەهەپێ چنە دەف ئیمام ئۆغلۆیی و ئەو یەک ژی دێ بیتە ئەگەرێ لاوازیا پارتا کۆماری، چونکی کەمال کلچدار ئۆغلۆ چو پرۆژێن نوو بۆ چارەسەریا رەوشا نها یا پارتا کۆماری نینە و هەکە رەوش وەسا بیت د هەلبژارتنێن سالا بهێت یا باژێرڤانیان دا ژی پارتیا کۆماری نەشێت یا سەرکەفتی بیت.
