چەند كـورد تەنازولـێ بۆ ئێك دو بكەن مەزناهییا وێ هەر بۆ كـوردانە
دیدار، سالار محەمەد دۆسكی:
پێشمەرگێ دێرین، فەیسەل رۆستینكی زێدەتر گۆت: ل ئیرانێ وەك وەلاتی و بێ چەك گەلەك جاران دا چینە باژێرەكی وەك (رزایێ یان زێوە یان شنو) هێزن دیموكراتێ هێرشكرینە مە چونكە ترۆمبێلێن مە د دیاربوون و چەند جاران كەفتیمە بەر ئەڤان شەران و سوپاس بۆ خودێ ب سلامەتی قورتال بوویمە.
پێشمەرگێ دێرین، فەیسەل رۆستینكی ئەو ژی ئاشكراكر كو دەمێ ل ئیرانێ گەلەك جاران هاتیە ئیراقێ و دەستیردان وەرگرتیە و هاتیە لژنا دهۆك و هەتا تازیا خودێ ژێ رازی (محەمەد صالح بوتی) پشكدار بوویە، گۆت: دەمێ تازیا خودێ ژێ رازی هاتیەدانان وی دەمی ژ بەر فرۆكێن دوژمنی تازیا رەحمەتی لبن قەسیسەكێ بوو ل دەڤەرا بۆتیان و قەسیسە یا درێژ بوو و هاڤین بوو و دوشكەك دانا بوونە هەر دو لایێن قەسیسێ وی دەمی مالا مە دزانی هاتیمە گوندێ بوتی یا و دەیكا من شیف دانا برایێ من كرە گری گۆت دێ شیف چەوا چیتە خوار برایێ مە ل پشت چیایی یێ برسی بیت و ئەز شیڤێ بخوم دلێ من ناچیتە خوارنێ، هاتنا من ب سالان بوو بۆ دەڤەرێ هەر دەمێ دهاتمە دەستیردانێ دا هێمە گوندی و خوە گوهورم و خوە گوندیەكێ مە ژی هایداری هاتنا من نەبوو.
پێشمەرگێ دێرین، فەیسەل رۆستینكی گۆت: دووماهی جار ل پێشمەرگاتیێ دەمێ ژ ئیرانێ دهاتینە كوردستانێ ب چوپی گەهشتینە ڤی لایێ ئاڤێ و هندەك ترۆمبێلێن زێباریان ئەم گەهاندین و هاتینە بابلو و دەمێ مە دهۆك دیتی ئێكسەر روند ژ چاڤێن مە هاتن و مە گەلەك كرە گری و مە هزر نەدكر دهۆك نوكە یا ئازاد بووی و د دەستێ پێشمەرگەی دایە و ئەو (10) سال بوو من دهۆك نەدیتی وی دەمی ب مالا خوە نەكەتم من زانی برایێ من خانیەكێ ل بەرۆشكێ كری لێ من نەدیت بوو و ڤێ نەكەفتم چونكە پێشتر مالا مە ل (تاخێ شێلێ) بوو و ئەو خانی نەمابوو، مرۆڤەك ژوردا دهاتە خوار و بیرا من وی هات كو خزمێن مە نە یێ زاویتەی بوو لێ یێ دو دل بووم و پشست راست نەبووم من هزر كر كو ئەو كەس ژ روویێ ئاخفتنێ ڤە نەیێ تەمامە لەوما من گۆت دێ سلاڤ كەمێ ودێ ژ دەنگی و ئاخفتنێ نیاسم وی دەمی جلكێن كوردی و كولاڤ و دەرسوك ل بەر من بوون و من سلاڤكر و ئەو ڤەما ئێكسەر من خوە دا نیاسین وی مرۆڤی كرە گری و ب من ڤە ماچی كر، من ژ خواست مالا مە نیشا من بدەت وی گۆت ب كولانێ دكەڤم لێ نوزانم كیش خانیە و ل گەل من هات و خانی پرسیار كر و خواست ئەو ئێكسەر بچیت دا مزگینیا هاتنا من بدەتە مالا مە و دووف دا دچووم دەمەكی من دیت دەنگێ قێریا ژ مالا مە هات و تلیلیا دا ژ كەیفا دا وی دەمی گەلەك بچیك مەزن ب بوون من نەدیت بوون و بابێ من كرە هەوار و داخازا چەكی كر دا و گۆت بوومن چەكی دا دلێ خوە هین كەم و كەسەكێ تڤنگ نەدایێ و من ئێكسەر تڤنگا خوە رادەستی بابێ خوەكر و (30) گولە هاڤێتن و شنی هات ماچیكرم ئەڤ بیرهاتنە چ جارا ژ بیرا من ناچیت، كەسەك (10) سالان مالا خوە نەبینت ئەیا ئەڤە نەگونەهكا مەزنە؟ ژبلی شەهید و كێمیابارانێ و ماندیبوونا خەلكی هوسا مەزن بووینە و ژیان دەربازبوویە.
پێشمەرگێ دێرین، فەیسەل رۆستینكی گۆت: پیشتر رێڤەبەرێ كارگێریێ مەكتەبا سیاسی بووم لێ پشتی سالا 1991ێ، ئەم پێنچ كەس ژ دامەزرێنەرێن فەرماندا دهۆك بووین و كاك (بابەكر زێباری) بەرپرسێ فەرماندێ بوو شەش هەیڤان فەرماندە هاتە ئاڤاكرن و وی دەمی هاریكارێ ئێمناهیێ كاك (بابەكر بووم ) و ئەندامێ فەرماندێ بووم، روودانێن بەری سەرهلدانێ هەمی بیرا مەبوون و هەمی خوزیێن مە ئەو بوون رژێما بەعس ژ دەست هەلاتێ بهێتە رامالین چونكە چنەما دژی مللەتێ كورد نەكری و هەتا لەشكەرێ سوریێ ئینا مللەتێ مە و جەنازێن ئەفسەرێن سوری ژ چیایێ مەتینی ڤەگوهاستینە سوریێ، پشتی روخاندنا رژێما گور بە گور 9/4/2003 ێ ب رێكەكێ داخاز ژ من هاتەكرن بچمە بەغدا و من گۆت شەرەفەكا مەزنە بوومن بەربژێرێ جەنابێ سەرۆك بارزانی بم و بۆ ڤی كاری بهێمە راسپاردن و پێكڤە ل گەل جەنابێ سەرۆكی چووینە بەغدا و دووف ب گەشتەكێ چووینە ئەمریكا دووڤ دا مە ل بەغدا هەتا رێكەفتی31/12/2020 هاتیمە خانەنشینكرن.
رۆستینكی گۆتژی: ماوێ (18) سالان ب پلا وەكیل وەزیر و جێگرێ جیهازێ موخباراتا عیراقێ بووم ل عیراقێ، وی دەمی دناڤا كارێ خوە دا و فەرمانگەهێن حوكمەتێ ب (فەیسەل دۆسكی) بەرنیاس بووم، چونكە ناڤێ گوندێ مە(روستینكی) یێ بزحمەت بوو د تەلەفونا دا بهێتە تۆماركرن، ئەڤجا جارەكێ(محەمەد عەبدوللا شەهوانی) سەرۆكێ جیهازێ موخابراتا عیراقێ بوو گۆت ما تو نە مرۆڤێ (دێوالی سەعید ئاغای)؟ من گۆتێ بەلێ گۆت ناڤێ گوندێ تە یێ بزحمەتە ئەم دێ بێژین (فەیسەل دۆسكی) بوومە وەك گۆتن خوشترە و دیسا ناڤێ (دۆسكی) بەرنیاس تربوو ژ (گوندی) ئەڤە بتنێ ل بەغدا و فەرمانگەهێن حوكمی، راستی بەغدا ژیانەكا نووی بوو وەك كورد گەلەك بهێز چووین و چەندین پوستێن بلند حوكمەتێ دا كورد بوون و سازیێن ئەمنی زێدەتر كوردان پلەكا باش تێدا هەبوون چونكە هندی مە زولم دیت بوو و مە نەهێلا ئەو زولم دوبارە بیتە ڤە، ژبلی 20 زێرەڤانێن كەسوكی من هەبوون 450 پێشمەرگە من ل گەل خوە برن دو لیوا زێرەڤانێن سەرۆك كوماری ل گەل (مام جەلال) بوون هەمی كورد بوون، كومبوونێن ئەمنی ل بەغدا دهاتنەكرن دو ئامر لیوایێن زێرەڤانێن كوماری 5000 هزار كورد ل گەل بوون، 90% كوردینی ل بەغدا دهاتەكرن و گەلەك جاران دناڤبەرا مە و حوكمەتا بەغدا، دا تێك چیت دا كومبوونەكا ئەمنی كەین چەوا خوە قورتال بكەین و بهێنە كوردستانێ و شەش حەفت هزار كورد ب مدرع و ئارپیچی ڤە هەر جهێ بهڤێت دێ خوە لێدەت و دەربازبیت، كەسەك نەشیا شەرێ ڤی لەشكەری بكەت ئەم ب قوەت بووین، تفاق و ئێكگرتنا كوردی مە هەبوو و بێ منەت بووین و عەرەبا هزرەك بوومە دكر و رەنگە ژكاودانێن نوكە نەباشتر بن بەلكو خراپتر بن و ئەڤە بۆ بێ تفاقیێ ڤەدگەریت و دوژمنێن مللەتێ مە ئەڤە ب دەرفەت دیت و كار لسەر كر چونكە ئەو پشست راست بوون نەشیانە كوردان و ئەڤە نە پلانەكا نوویە بكارتینن، هەر چار وەلاتێن (توركیا، ئیران، عیراق، سوریا) ئاریشێن دوم درێژ ل گەل ئێك هەبووینە ماوێ بوری دا لێ تەنسیقەكا ئەمنی یا هەڤپشك ل گەل ئێك هەبوو بۆ مەلەفێ كوردی هەر چار برایێن دایكوبابی بووینە.
پێشمەرگێ دێرین، فەیسەل روستینكی زێدەتر گۆت: مللەتێ من گەلەك ماندیبوون دیتی یە گەلەك خوین رێتی یە و دەست بۆ دەستی ئەمانەتە دهێتە ڤەگوهاستن و هەر ئێك ب دلسوزی و شیانێن خوە كاربكەت دا پشكەكا وێ بوشاهیێ پر بكەت و چەند كورد بشێن تەنازولێ بۆ ئێك دو بكەن مەزناهیەكە هەر بۆ كوردان دا ژ ڤی دوژمێ مەزن بهێینە رزگاركرن.
