خۆشحالین گەنجێن خودان پێدڤیێن تایبەت پشكداری چاڵاكیێن مە بن
بێوار حەمدی
وەكو دیار مالا لاوان پتر خۆ ل ئاریشێن تەخا گەنج و لاوان دكەتە خودان و خولێن جۆرا و جۆر د هەموو بواران دا ڤەدكەن. كاوار نێروەی بەرپرسێ مالا لاوان گۆت: دەرگەهێ مە یێ ڤەكریە بۆ هەمی گەنجێن پارێزگەها دهۆكێ و ئەم نەڕێگرین ل چو كەسان و ب بەشداربوونا كەسێن كێم ئەندام و خودان پێدڤیێن تایبەت گەلەك دلخوش دبین.
كاوار نێروەیی، بەرپرسێ مالا لاوان ل دهۆكێ د دیدارەكێ دا بۆ رۆژناما ئەڤرۆ گۆت: وەكو یا دیار ئەم ئێكەتیا لاوێن كوردستانێ هەر ژ دامەزراندنا مە ئارمانجا مە یا سەرەكی و دەسپێكێ ئەووبوویە خزمەتا تەخا گەنج و لاوان بكەین، ژ بەر هندێ ئەركێ مە یێ سەرەكی ئەوە ڤی لاوی بێخینە سەر سكەی و تژی زانیاری بكەین، دا كو دگەل هەموو قوناغان ب گۆنجن و بشێین خزمەتا گەل و وەڵاتێ خۆ بكەن.
بەرپرسێ مالا لاوان گۆت ژی: ئەم خولێن جوراوجور د هەموو بواران دا ڤەدكەین، وەكو مالا لاوان ئەم پتر خۆ ل ئاریشێن گەنجان دكەینە خودان، و مە ساڵانە كوربەندێن ئەكادیمی و كەسێن بسپور و شارەزا هەنە كو ئاریشا لاوی یا وێ ساڵێ دەستنیشان دكەن و ڤەكۆلینان ل سەر دروست دكەن، دەرئەنجامێن وێ ڤەكۆلینێ ژی ئەم بۆ جهێن پەیوەندیدار ئاراستە دكەین، دگەل هندێ خول و چاڵاكیێن (رەوشەنبیری و سیاسی و نەتەوەی و نشتیمانی و ئایینی) ئەنجام ددەین و زێدەباری ئەم گرنگیێ ب خولێن پیشەیی ژی ددەین.
كاواری ئەو چەندە ژی ئاشكرا كر، دەرگەهێ مە یێ ڤەكریە بۆ هەموو گەنجێن پارێزگەها دهۆكێ و بۆ هەموو ئول و نەتەوەیان بێی فەرق و جوداهی، ب تنێ مەرجێ مە ژ بۆ بەشداریا گەنجان د چاڵاكی و خولان دا دڤێت ژیێ وی ژ 14 سالیێ كێمتر نەبیت و ژ 35 سالیێ پتر نەبیت و گۆت: (ئەم گەلەك دلخوش دبین دەما دبینین گەنجەكێ خودان پێدڤیێن تایبەت بەشداریێ د چاڵاكیێن مە دا دكەت و ئەم ب هیچ شێوەیەكی نەرێگرین ل بەردەم بەشداربونا ڤان كەسان، د پلانامە دایە ب هەلكەفتا رۆژا جیهانیا لاوان كچەكا گەنج یا كێم ئەندام دێ بەشداریێ دگەل مەدا كەت و ئەم یێن لێگەریاین دا كو ڤان كەسا پەیدابكەین).
ل دووماهیێ ژی دا زانین، گەلەك جاران دبێژن رێژەیا بەشداربوونا رەگەزێ مێ پترە ژیێ نێر، بەلێ ل دەڤ مە چ جیاوازی نینە و ئەم خولێن هەمەجور بۆ هەردوو رەگەزان ڤەدكەین، بەلێ هندەك جاران ئەم هندەك خولان ڤەدكەین كو ب تنێ گرێدای رەگەزێ مێ نە وەكو (دروارێ و مێكئاپێ)، ژبەر هندێ د ڤان خولا دا ب تنێ ئافرەت بەشداردبن، ئەگەر ب شێوەیەكێ گشتی ئەم گرنگیێ ب هەموو گەنجا ددەین بێی جوداهیا ئولی و رەگەزی.
