ئەو رۆژا سەدام هاتیە دهۆكێ مە ب نارنجۆكان دانا ترۆمبێلا ئەمنێ هەر وێ رۆژێ ب فڕۆكا خوە چوو زاخۆ
دیدار، سالار محەمەد دۆسكی:
زڤنگی گۆت: ل سالا 1981ێ ئوتێلەك بەرامبەر قائیمقامییا دهۆك هەبوو وی دەمی قائیقامی دناڤا ل بنگەهێ پولیسان دا بوو، و بن دەرجێن ئوتێلێ هەڤالەكێ مە بناڤێ(ماجد گەلناسكی) چا دفرۆت، و من جانتەكێ خوە دانا بن دەرجێن وی و كاسێتەكا (شڤان پەروەری) جانتەی دا بوو، پیرەژنكا نەدروست هەبوو بازاری بناڤێ (پیرۆز) مسەجلەك دەستی دا بوو و دەنگێ بلند بوو، ئەم چار هەڤال بووین و رێككەفتین كاسێتا (شڤان پەروەری) بدەینە ڤێ پیرەژنێ و د ناڤبەر (ئێڤاری و نیڤرۆ) دا بوو، و مە كاسێت دایێ و ئێكسەر دانا سەر و مە چاڤدێری كر خەلكەكێ زور لێ كومبوو، و ترۆمبێل راوستیان و شوفێران تەماشەی (پیرۆزێ) كر، وی دەمی هەر كەسەكێ هاتباگرتن و ئەڤ كاسێتە دەستی دا ئێكسەر سێدارەدان بوو، پشتی چەندەكێ ترۆمبێلەكا ئەمنێ هات و دەستێن وێ پیرەژنێ گرتن و ب پێنا مسجلا وێ شكاند هەتا دەنگێ (شڤانی) نەهێلای وێ روودانێ گەلەك كیفامە پێ هات و دەنگڤەدا ل باژێری و ئەڤە مە كر دا دوژمن بزانیت خەلك هەنە دژی وان و خودان مافن و ئارمانج هەنە و بەردەوام پوستە و بەلاڤووكێن پارتی مە دگەهاندنە رێكخستنێ و خەلكێ خوە و بزاڤێن مە گاڤ بۆ گاڤێ بەر فرەه دبوون، شەڤا نەوروزێ سالا 1981ێ مە ئاگرێ نەروزێ ل سێ گركا هەلكر و بەلاڤوك هاتنە بەلاڤەكرن و ئەم چار گرۆپ بووین هاتینە بەلاڤەكرن ل (جادا سینەمێ، جادا نەخوشخانێ، نێزیك گەلی فندق قەصر جبل فندق ژیان و تاخێ كوچەرا ) ژی و مە ب نارنجوكان دانا ترۆمبێلەكا ئەمنێ و كاودان باژێری تێكچوون وێ رۆژێ دا (صەدام) هێتە دهۆك فرۆكا وی هاتە گورەپانا نەخوشخانا گرێ باصێ و ئێكسەر بلندبوو، و نەما ل دهۆك ئێكسەر چوو زاخۆ وێ رۆژێ دایكا (ئەردەوانی) خوە هاڤێتە ئاڤێ و داخازا كورێ خوە ژ صەدامی كربوو، رۆژا دووڤدا مە ئاهەنگا نەوروزێ ل گرێ قەسرۆكا هەبوو چووینە ناف دا عەمەلیاتەكێ بكەین لێ دەردورێن مە هەمی ئەمن بوون و نەچاربووین هەر ئێك ژ مە بخوە دەركەڤیت چونكە زانیاری ل سەر مەهاتبوونە كومكرن و مە خوە قورتالكر.
محەمەد زڤنگی گۆتژی: ل سالا 1981 فەرمانا دەستەسەركرنا من هەبوو و هەتا سالا 1988 بەری ئەنفالان جارەكێ ب ترۆمبێلەكێ ژ سێمێلێ دهاتمە دهۆك و زالگەهەكا ئەمنێ ل نێزیك چاڕیانا دهۆك – سێمێل بوو و دەستەسەركرم، پشتی كەسەكێ كورد هژمارا ترۆمبێلا من رادەستی جەلادێن ئەمنێ كری هاتمە دەستەسەركرن، ئەو كەسێ زانیاری داینە ئەمنێ پێشتر برایەكێ وی ل گەل مە هاتبوو شەهیدكرن، و مە نەدزانی پشتی برایێ وی شەهید بووی ئەو بووینە فەرمانبەرێ ئەمنێ، 17/5/1988 هاتمە دەستەركرن و شەش هەیڤان ل ئەمنا دهۆك قوتانەكا بێ وژدان و 28 رۆژان كەتمە نەخوشخانێ دا، و دەرگەه و پەنجەر ب زنجیرا گرتی و دڤێت یێ ئەمنێ دەرگەه ڤەكربا، ئەگەر نوژداران نەشیار سەرەدانا من بكەن، وی دەمی نەڤیا بمرم، ب قوتانێ هاتمە بەرمرنێ و ئەمنێ زانی من هەمی زانیاری هەنە، چونكە ئەوێ ل گەل ئەمنێ پێشتر هاریكارێ شانەكێ بوو چەندین جاران هاتبوو نیك من ول مالا مە نڤست بوو، و زانیاری تەمام هەبوون و هەتا ناڤێن نهێنی دابوونە ئەمنێ، پشتی ئەنفالێ لێبورینەك هات گۆت ب مادێ سیاسی هاتیە ئازادكرن، لێ مادێ كوشتنێ ل سەر تە هەیە و خوینداری رادەستی قائیمقامیێ كرم و ئەم پێك هاتبووین، و ئەوا گۆت مافێ گشتی دڤێت بهێتە بجهئینان كو (20) سالان زیندانە، و سالا 1995ێ پشتی لێبورینەكا عەشیرەتگەری د ناڤبەرا حكومەتێ و عەشتیرەتان دروست بووی حكومەتێ گۆت هەر كەسێ د ناڤبەرا خوە دا پێكهاتبیت ئازاد بكەن و هاتمە ئازادكرن.
ناڤبری گۆت: وێ قوتانا ئەمنا دهۆك من مرنا خوە دیت و ئەگەر نوژدارەكێ نیاسی وێ شەڤێ نەگەهشتبا من بەرهەڤی من بۆ خوە كوشتنێ كربوون، ل ئەنفالان دەمێ لێبورین دای ئەم ل ئەمنێ بووین و دەنگێ تەلەڤزیونا زێرەڤانان دهاتە مە، وی دەمی جەلادەكێ نەخوش ل ئەمنێ هەبوو دەمێ هاتبا مرۆڤێ نڤێستی دا نەعالا مرۆڤی وەركەت، و نەهێلا مرۆڤێ نڤستی با و رۆژەكێ ئەو جەلاد هات و دەنگۆیێ لێبورینێ ب مە راگەهاند، و گۆت دێ چم پاش بكەنە ئاهەنگ و بلا كەس نەزانیت هاتیمە نیك هەوە، و هەمان جەلاد ل سەر دەرجێن زیندانێ ل ئەمنا دهۆك ئەڤ دوعایە كر، یا خودێ بۆ خاترا ناڤێن خوە كەیە ئەڤە نەجهێ ژیانێ یە یا خودێ رۆژەك بهێت ئەڤ جهە ببیتە نەخوشخانەك یان جهێ زانینەگەهەكێ، چونكە ئەڤە نەجهێ ژیانێ یە، نوكە ئەمنا دهۆك بوویە كولیژەك ژ زانكۆیا دهۆك.
