هژمارەک پەرلەمانتارێن ئیرانێ هۆشداریێ ددەنە سەرۆک کۆماری
هژمارەک ژ ئەندامێن پەرلەمانێ ئیرانێ د نامەکێ دا بۆ سەرۆک کۆمارێ وی وەلاتی دیار کرن، رۆژ ب رۆژێ دەستهەلات یێ دکەڤیتە دەستێ کەسێن سەربازی، ئەو یەک ژی ئەنجامێن خوە یێن گەلەک خراب هەیە، چونکی کەسێن سەربازی ئەو شیان نینن بشێن وەکو پێدڤی خزمەتا خەلکی بکەن، ژ بەر هندێ ژی گەلەک ئاریشە روو ددەن، هەکە رەوش وەکو نها بەردەوام بیت دێ جارەکا دی خەلک دەست ب خوەنیشادانان کەن، چونکی رۆژ ب رۆژێ خەلک پتر ژ دەستهەلاتێ توورە دبن و ل ئالیێ دی ژی رەوشا ئابووری گەلەک خرابە.
وان پەرلەمانتاران هەروەسا داخواز ژ ئیبراهیم رەئیسی سەرۆک کۆمارێ ئیرانێ کرینە، کو د زووترین دەم دا دەست ب چاکسازیان بکەت و بەرپرسێن خەمسار ب توندی سزا بدەت، چونکی نها پتر ژ هەر دەمەکێ خەلک یێ ژ دەستهەلاتێ توورە یە، ئەو یەک ژی دێ مەترسیەکا خوە یا گەلەک مەزن بۆ پاشەرۆژا ئیرانێ هەبیت، دڤێت سەرۆک کۆمار ب ئەرکێ خوە رابیت و دەست ب چاکسازیێن پێدڤی د هەموو بیاڤان دا بکەت.
