گەنجێ مە ل هیڤیا هندێ یە بێژینێ ژ مال دەركەڤە و وەرە ل دەڤ من كار بكە
، هەرهین محەمەد:
دبێژن گەنج دینەمویا هەر وەلاتەكییە ژ بۆ سەركەفتنێ و هەر گەنج بووینە خودان شیان داهێنانێ د هەر كارەكێ هەبیت دكەن. نیهاد حەجی ژی ژ ئەوان گەنجایە ل دەستپێكا خوە گەلەك كاركرینە و قوناغ بۆ قوناغێ خوە پێش ئێخستییە و گەلەك جاران كەفتیە و بهێزتر لێ هاتیە و نوكە ژی خودان كارە.
نیهاد حەجی، گەنجەكێ باژێرێ دهۆكێ یە چیرۆكا سەركەفتنا خۆ د كاری بۆ ئەڤرۆ ڤەدگوهێزیت و دبێژیت: د ژیێ 11 سالیێ دا من ل ماركێتەكێ كاركریە و هێدی هێدی كەفتمە د كاری دا بۆ كارێن جودا جودا و زەحمەتەكا زێدە من بر و ل سالا 2013 ئەز بۆ مە خودان كارێ خوە یێ تایبەت و من ماركێتەك ڤەكر و پشتی دوو سالان من ماركێتەكا دی ژی ڤەكر ب تنێ یا فێقی بوو و ل گەل هندێ ژی هەر یێ بەردەوام بووم د خواندنێ دا و پشتی هاتنا رێكخراوا تیرۆرستی یا داعش كاودان گەلەك د نەخوش بوون و نەچار بووم دەستا ژ خواندنا خوە بەردەم، دا كو داهاتەكی بۆ مالا خوە پەیدا بكەم و ل وی دەمی چووم من دەست ب كارێ چێكرنا شریناهییان كر و ل سەر ئەوی كاری دوو سالان یێ بەردەوام بووم و نوكە قوتابیێ زانكۆیێ مە ل قوناغا چارێ و هەروەسا مە گرۆپەك دانایە و ب هاریكاریا وان هەڤالان مە شیایە دوو پەرتوكان ب وەرگێرین بۆ زەراڤێ بادینی و د ڤی كاری ژی دا یێ بەردەوامم.
زێدەتر گۆت: یا ب زەحمەتە مرۆڤ كارگێریا جهەكی بكەت و هاتن و چوون و كرین و فرۆتن و لێكدانا كەل و پەلان و بۆ ڤی كاری ژی هەر كەسەك كارێ خوە دكەت و نوكە ژی ل كومپانییەكا كەل و پەلێن خارنێ كار دكەم و ب تنێ سەرپەرشتییا وی جهی دكەم و دبینم خالا سەركەفتنا مرۆڤی د هندێ دایە مرۆڤ ئاخفتنێن خەلكی پشتگوه پاڤێت و مرۆڤ یێ بهێز بیت و مرۆڤ بشێت بەردەوامیێ ب شیانێن خوە بدەت و دەمێ مرۆڤ ب كەڤیت مرۆڤ نەمینت كەفتی و بەروڤاژی مرۆڤ ب هێزتر لێ بهێت و ناهێتە هژمارتن گەلەك جاران كەفتیمە و جارەكا دی رابوویمە سەر پێن خوە و كەتن نەبوویە ئەگەر د كارێن خوە دا ب راوەستم.
