ب گوژمێ 318 ملیۆن دیناران جاددەیێن ناڤخوەیی ل ناوچەداریا بجێلێ دهێنە چێكرن
سەرۆكێ باژێرڤانیا بجێل راگەهاند، دەست بجهئینانا هەژمارەكا پڕۆژەیێن خزمەتگوزاری ل ناوچەداریا بجێل هاتیە كرن و دبێژیت: نوكە پڕۆژەیێ چێكرنا جاددەیان ب درێژاهیا پتر ژ دو كلیۆمەتران ب گوژمێ 318 ملیۆن دیناران دهێتە چێكرن.
هێمن سەلیم خان، سەرۆكێ باژێرڤانیا بجێلێ ئاشكرا كر، گوژمێ 318 ملیۆن دیناران بۆ چێكرنا هەژمارەكا جاددەیێن ناڤخوەیی ل ناوچەداریا بجێلێ هاتینە تەرخانكرن و گۆت: «نوكە ئەڤ پڕۆژە د قووناغا تەندەری دایە، پشتی دهێتە راگەهاندن و بەلێندەر وەردگریت دێ دەست بجهئینانا پڕۆژەیێ چێكرنا جاددەیان و سەخبێریا جاددەیان هێتە كرن ب درێژاهیا دو كیلۆمەتر و 200 مەتران».
ناڤهاتی گۆتژی: «ب درێژاهیا 248 مەتران كارێ جوانكاری بۆ دیوار و دەرگەهێ ناوچەداریا بجێلێ هاتیە كرن و ب بوویاغا هەمەرەنگ دیوار هاتینە رەنگكرن، ئەڤ كارە ل سەر پێشینەیا مەهانە یا باژێرڤانیا بجێلێ هاتیە بجهئینان و بۆ پتر رێكخستنا باژێری، دیوار و دەرگەهێ بجێلێ هاتیە جوانكرن و خەملاندن».
