ئینانا هندەك بەرهەمێن بیانی هاتە قەدەغەكرن
هەولێر، قائید میرۆ:
وەزارەتا چاندن و ژێدەرێن ئاڤێ یا حوكمەتا هەرێما كوردستانێ بڕیار دا ئینانا هندەك بەرهەمێن بیانی د دەمێ نوكە دا بهێتە قەدەغەكرن و پەیڤدارێ وەزارەتێ ژی دبێژیت: سالانە ل گورەی رۆژناما چاندنێ و ب مەرەما پاراستنا بەرهەمێ ناڤخوە، ئینانا هندەك بەرهەمێن بیانی دهێتە قەدەغەكرن.
هیوا عەلی، پەیڤدارێ وەزارەتا چاندنێ بۆ رۆژناما ئەڤرۆ دیار كر، وەزارەتا چاندنێ رۆژناما چاندنێ بەرهەڤكریە و سالانە د دەمێ گەهشتنا بەرهەمێ ناڤخوەی دا، ئینانا هندەك بەرهەمێن بیانی دهێتە قەدەغەكرن و رێك ناهێتەدان بەرهەمێ بیانی بهێتە د ناڤ بازاڕێن كوردستانێ دا هەتا بەرهەمێ ناڤخوەیی هەبیت و گۆت: «هەردەمێ بەرهەمێ ناڤخوەیی نەما ئەڤە دێ رێك ب بەرهەمێ بیانی هێتەدان و باج كەڤیتە سەر ئینانا بەرهەمێ بیانی ئەڤە ژی بۆ پاراستنا بەرهەمێ ناڤخوەیی یە و پشتەڤانیا جۆتیارانە ژ لایێ حوكمەتا هەرێما كوردستانێ ڤە».
هیوا عەلی گۆتژی: «ل هەرێما كوردستانێ هندەك بەرهەمێن ناڤخوەیی د دەمێ پێگەهشتنێ دا بەهرا بازاڕێن ناڤخوە دكەن و هندەك بەرهەم ژ پێدڤیا ناڤخوەیی زێدە ژی دكەن و بۆ پارێزگەهێن ناڤەڕاست و باشوورێ ئیراقێ دهێنە هنارتن، چونكی بەرهەمێ جۆتیارێن كوردستانێ ییێ زۆرە و تێرا هەرێم و ئیراقێ ژی هەیە، لەوڕا ژی هندی بەرهەمێ خۆمالی هەبیت رێك ناهێتەدان بەرهەمێ بیانی بهێتە د ناڤ بازاڕی دا».
