ژ بۆ پاراستنا گیانێ گەشتیاران ڕێیا پەیادە یا گەلیێ شێرانە هاتە پەرژانكرن
ئامێدیێ، مەحمود نهێلی:
ژ بۆ پاراستنا گیانێ گەشتیاران ژ كەفتنێ، ئەو رێیا دچیتە پشتا گەلیێ شێرانە، كو یا ب مەترسی و فڕەك بوو، هاتە چێكرن و پەرژانكرن.
موقەدم بێوار عەبدولعەزیز، پەیڤدارێ رێڤەبەریا بەرەڤانیا باژێری ل پارێزگەها دهۆكێ بۆ رۆژناما ئەڤرۆ دیار كر، ئەڤ رێیا پیادەیا پشتا كۆمەلگەها ئاڤا شین یا گەشتیاری رێیەكا فڕەك بوو، یا ب مەترسی بوو، هند جاران گەشتیار تێدا فڕینە و بریندار بووینە و گۆت: «زێدەباری مەترسیا وێ، رێژەكا زۆر یا گەشتیاران قەستا وی جهی دكر، دیارە جهەكێ خوەش و دلڤەكەر بوویە».
دیار ژی كر، وەزارەتا ناڤخوە كۆمبوونەك ئەنجام دا و بڕیار دا، كو ئەڤ رێیە بهێتە چێكرن و گوژمەكێ پارەی ژ لایێ وەزارتا ناڤخوەڤە بۆ هاتە تەرخانكرن، ئەڤە ژی ئێك ژ وان رێكاران بوویە، پێخەمەت پێشخستنا كەرتێ گەشتوگوزاری ل دەڤەرێ و گۆت: «مە ب فەر دیت ئەڤ رێیە بهێتە چێكرن و پەرژانكرن».
گۆتژی: «زێدەباری پەرژانكرنا پشكەكا زۆرا ڤێ رێیێ وەكو پێستركەكێ و سكەی بۆ هاتیە چێكرن و هەم پاراستنا گیانێ گەشتیاران هاتیە بەرچاڤكرن و هەم ژی جوانیەكا زۆر دایە وی جهی، ب تایبەت رێیا دچیتە وی جهێ گەشتیاری، هەر د ڤێ كۆمبوونێ دا بڕیارە هاتە دان كو هندەك كەس وەك خوەبەخش بهێنە دانان وەك نقۆمڤان ل سەر ڤان جهێن گەشتیاری».
