ئه‌مریکا: دێ پێگەهێ خوە یێ سەربازی ل ئیراقێ و سووریێ بهێزتر کەین
مارک میلی سه‌رۆک ئه‌رکانێ گشتی یێ لەشکرێ ئه‌مریکا د داخۆیانیه‌کا رۆژنامه‌ڤانی دا راگه‌هاند کو په‌یوه‌ندیێن وان یێن دێرین ل رۆژهه‌لاتا ناڤین هه‌نه و رۆژهەلاتا ناڤین بۆ ئه‌مریکا گه‌له‌ک گرنگه و گۆت: (ئه‌مریکا د چارچۆڤێ ستراتیژیه‌کا ده‌مدرێژ دا خه‌باتێ دکه‌ت و د قۆناغا نها و پاشه‌رۆژێ دا ژی چ پلانه‌کا مه یا ڤه‌کێشانا ژ رۆژهه‌لاتا ناڤین نینه. مە پەیوەندیێن ستراتیژی ل گەل گەلەک ژ وەلاتێن رۆژهەلاتا ناڤین هەنە، رۆژهەلاتا ناڤین جهەکێ گرنگ یێ وزێ یە و ئەمریکا ژی دڤێت ئەو دەڤەر یا پاراستی بیت، ژ بەر هندێ ژی ئەم نها پتر ژ هەر دەمەکێ گرنگیێ ددەینە رۆژهەلاتا ناڤین).
ناڤهاتی د پشکه‌کا دی یا ئاخڤتنا خوه دا بەحسێ ره‌وشا سووریێ و ئیراقێ کر و راگه‌هاند کو ئارمانجێن مه ل ئیراقێ و سووریێ هه‌نه و د ره‌وشا نها دا گه‌نگه‌شه یان بەرنامەکا وان ژ بۆ ڤه‌کێشانا ژ هه‌ر دو وه‌لاتان نینه و گۆت: (هەتا نها ژی داعش و رێکخستنێن دی یێن تیرۆرستی مەترسینە ل سەر بەرژەوەندیێن ئەمریکا، ژ بەر هندێ ژی ئەمریکا نها دڤێت پێگەهێ خوە یێ سەربازی ل ئیراقێ و سووریێ بهێزتر ژی بکەت، ئەو یەک ژ بۆ ئارامیا رۆژهەلاتا ناڤین ژی گەلەک یا گرنگە).
