هـاکـان فیدان دێ گـوهۆڕینێن بەرچـاڤ د سیاسەتا دەرڤە دا کـەت
بسپۆرەکێ کاروبارێن سیاسی یێن تورکیا دیار دکەت، ژ بەر قەیرانا ئابووری و رەوشا نها یا ل دەڤەرێ تورکیا هەست ب هندێ دکەت کو پێگەهێ وێ لاواز بوویە، ژ بەر هندێ ژی هاکان فیدان دڤێت گوهۆڕینێن بەرچاڤ د سیاسەتا دەرڤە دا بکەت و ناکۆکیێن هەی چارەسەر بکەت.
موراد یێتکین بسپۆرێ کاروبارێن سیاسی د داخۆیانیەکێ دا بۆ دەزگەهێن راگەهاندنا تورکیا دیار کر، تورکیا د قەیرانەکا گەلەک مەزن یا ئابووری دایە، ل ئاستێ جیهانێ و رۆژهەلاتا ناڤین گوهۆڕینێن بلەز روو ددەن، گەلەک ژ وان گوهۆڕینان بێگومان د بەرژەوەندیا تورکیا دا نینن، نها رەوشەکا گەلەک جودا هاتیە پێش، تورکیا دڤێت پێگەهێ خوە بپارێزیت و ژ بەر هندێ ژی هاکان فیدان وەکو وەزیرێ دەرڤە یێ تورکیا دەست ب قۆناغەکا نوو د سیاسەتا دەرڤە دا کریە، تورکیا دڤێت ناکۆکیێن هەی ل گەل وەلاتێن رۆژهەلاتا ناڤین چارەسەر بکەت و دڤێت خوە نێزیکی ئەمریکا و ئۆرۆپا ژی بکەت، چونکی سیاسەتا سەردەمێ مەولوود چاڤوش ئۆغلۆیی زیانێن خوە بۆ تورکیا هەبوون و گۆت: (ژبەر هندێ ژی نها هاکان فیدان وەکو وەزیرێ دەرڤە یێ تورکیا ل سەر ستراتیژیەکا جودا کار دکەت، تورکیا دڤێت د پێنگاڤا ئێکێ دا ناکۆکیێن هەی ل گەل وەلاتێن رۆژهەلاتا ناڤین چارەسەر بکەت یان ژی کێم بکەت، د پێنگاڤا دویێ دا ژی تورکیا یێ بزاڤان دکەت خوە نێزیکی ئەمریکا و ئۆرۆپا بکەت، چونکی ژ بەر قەیرانا ئابووری و ناکۆکیێن تورکیا یێن ل گەل وەلاتێن رۆژهەلاتا ناڤین، تورکیا پێگەهێ خوە یێ جاران یێ ژ دەست ددەت، ژ بەر هندێ ژی هاکان فیدان دڤێت جارەکا دی تورکیا بهێز ڤەگەریتە ڤە ناڤ سیاسەتا رۆژهەلاتا ناڤین و جیهانێ).
ناڤهاتی د پشکەکا دی یا ئاخڤتنا خوە دا ئەو یەک ژی دیار کریە، ژ بۆ تورکیا نها گەلەک یا گرنگە بشێت پێگەهێ خوە یێ ئابووری بهێز بکەت، سەرەدانا هاکان فیدان بۆ ئیراقێ و پاشی ژی ژ بۆ ئۆکرانیایێ نیشا ددەت تورکیا ل رێیێن نوو دگەریت دا رەوشا ئابووریا خوە باش بکەت، لێ بێگومان ئەو یەک یا ب ساناهی نابیت، چونکی نها ناکۆکیێن مەزن د ناڤبەرا تورکیا و رۆسیا دا ژی هەنە، رۆسیا ژ هەلوەستێ ڤێ دووماهیێ یێ تورکیا دلگرانە و هەتا نها ژی سەرۆک رۆسیا بەرهەڤ نینە سەرەدانا تورکیا بکەت، ل ئالیێ دی بابەتێ پەنابەرێن سووریێ و قەیرانا ل وی وەلاتی ژی کاریگەریا خوە ل رەوشا تورکیا کریە، ژبەر ڤان خالان هەموویێ تورکیا د رەوشەکا باش دا نینە و گۆت: (هەکە هاکان فیدان بشێت هندەک ژ ڤان قەیرانان چارەسەر بکەت و دەرگەهێن نوو بۆ تورکیا ڤەکەت بێگومان دێ شێت ببیتە ئەگەرێ دەستپێکرنا قۆناغەکا نوو، لێ بەرۆڤاژی هندێ دێ رەوشا تورکیا خرابتر لێ هێت).
