600 هزار شتلێن داران هاتینە چاندن
هەولێر، قائید میرۆ:
رێڤەبەرێ گشتیێ باغداری و دارستانان ل حوكمەتا هەرێما كوردستانێ راگەهاند، ب تنێ د ئەڤ سالە دا 600 هزار شتلێن داران هاتینە بەلاڤكرن و چاندن و دبێژیت: ژ بەر گوهۆڕینا سەقایێ دەڤەرێ گەلەك جاران ئەو دارێن دهێنە چاندن هشك دبن.
هەلكەوت عەبدولڕەحمان ئیسماعیل، رێڤەبەرێ گشتیێ باغداری و دارستان و پاوانی بۆ رۆژناما ئەڤرۆ دیار كر، ب تنێ د ئەڤ سالە دا رێڤەبەریا وان 600 هزار شتلێن داران داینە دەزگەهێن حوكمەتێ و رێكخراوێن ژینگەهێ، داكو بچینن، بەلێ ب مەرجەكی پشتی چاندنێ بهێنە پاراستن و جهێ وان داران ژی بهێنە ئاشكراكرن و ب تنێ بۆ وێنە گرتنێ دار نەهێنە چاندن و گۆت: «وەزارەتا چاندنێ د پلانا خوە یا ئەڤ سالە دا بۆ چاندنا داران ب سەركەفتیانە ب دوماهی ئینایە و دارێن هاتینە چاندن دێ هێنە پاراستن، چونكی دار تنێ هەر چاندن نینە، بەلكو قووناغا پشتی چاندنێ ژی هەیە و دڤێت بهێنە پاراستن و چاڤدان».
