فیستەڤالا بەرهەمێن ناڤخوەیی ل ئاكرێ دێ هێتە ئەنجامدان
ژێر چاڤدێریا پارێزگارێ دهۆكێ بڕیارە ئەڤرۆ 3/9/2023 فیستەڤالا بەرهەمێن ناڤخوەیی ل ئاكرێ بهێتە ئەنجامدان و هەموو بەرهەمێن ناڤخوەیی یێن چاندنێ، ئەوێن ل دەڤەرێ دهێنە بەرهەمئینان؛ بهێنە نیشادان.
ئەندازیار فازل مستەفا، رێڤەبەرێ چاندنا ئاكرێ بۆ ئەڤرۆ گۆت: «فیستەڤالا بەرهەمێن ناڤخوەیی ل ئاكرێ، ل جادا رەزا دێ هێتە ئەنجامدان و هەموو بەرهەمێن ناڤخوەیی یێن دەڤەرا ئاكرێ تێدا دێ هێنە نیشادان».
گۆتژی: «ئاكرێ گەلەك یا زەنگینە ب بەرهەمێن خۆمالی، ئەڤ جۆرە فیستەڤالە دێ پتر بنە ئەگەر، كو جۆتیارێن دەڤەرێ گرنگیێ ب بەرهەمێن خۆمالی بدەن، 20 جهێن تایبەت هاتینە دروستكرن و هەر جهەكی دێ بەرهەمەكێ خۆمالیێ دەڤەرێ هێتە نیشادان، وەكو: بەرهەمێ هنگڤینی و تری و هژیر و دۆندرمە و برنج و سماق و باهیڤ و گەلەك بەرهەمێن دی».
