ل شوونا پارچەیێن ئەردی شوقە بۆ خێزانێن شەهیدان دێ هێنە ئاڤاكرن
پەیڤدارێ وەزارەتا شەهید و ئەنفالكریان ئاشكرا كر، بڕیارا سەرۆكایەتیا جڤاتا وەزیران ل دۆر ئاڤاكرنا شوقەیان بۆ كەسوكارێن شەهیدان كەفتیە د بیاڤێ بجهئینانێ دا و دبێژیت: ژ نوكە وێڤە پارچەیێن ئەردی ل سەر خێزانێن شەهیدان ناهێنە بەلاڤكرن.
عادل حەمە سالح، پەیڤدارێ وەزارەتا شەهید و ئەنفالكریان بۆ رۆژناما ئەڤرۆ دیار كر، وەزیرێ شەهید و ئەنفالكریان پێشنیارا ئاڤاكرنا شوقەیان بۆ كەسوكارێن شەهیدان پێشكێشی سەرۆكایەتیا جڤاتا وەزیران كریە و گۆت: «پشتی هاتیە پەسەندكرن رێكارێن بجهئینانا ئەڤێ بڕیارێ د دەمێ نها دا كەفتینە د بیاڤێ بجهئینانێ دا و وەزارەتا شەهیدان ل گەل دەستەیا وەبەرهێنانێ هەماهەنگیێ دكەت بۆ ئاڤاكرنا شوقەیان و پشتی تەمامبوونا رێكاران دێ دەست ب ئاڤاكرنا شوقەیان هێتە كرن».
ناڤهاتی گۆتژی: «هەر خێزانەكا شەهیدی ژ نوكە وێڤە بڕیارا پارچەیێن ئەردی بۆ بهێتە دەركرن ناهێتە بجهئینان، بەروڤاژی ل جهێ پارچەیێن ئەردی دێ شوقە بۆ هێنە ئاڤاكرن و ل سەر كەسوكارێن سەربلندێن شەهیدان هێنە بەلاڤكرن».
