پارتا کۆماری نەشێت د ڤێ رەوشێ دا چو گوهۆڕینان بکەت
پەرلەمانتارەکێ کورد ل پەرلەمانێ تورکیا راگەهاند، پارتا کۆماریا گەل وەکو پارتا هەری مەزن یا ئۆپۆزسیۆنا تورکیا د ناڤ قەیرانەکا مەزن دایە و نەشێن خوەدان ژ ئەندامێن خوە دەرکەڤن، کەمال کلچدار ئۆغلۆیی ژی سەلماند ئەو نەشێت ببیتە کەسەکێ کاریگەر د سیاسەتا تورکیا دا، ژ بەر هندێ ژی پێدڤیا پارتا کۆماری ب گوهۆڕینێن بنگەهین هەیە.
سڕی ساکیک ئەندامێ پەرلەمانێ تورکیا سەر ب پارتا چەپ یا کەسک د داخۆیانیەکێ دا راگەهاند، کەمال کچدار ئۆغلۆ سەرۆکێ پارتا کۆماریا گەل نەشیا خوەدان ژ ئەندامێ پەرلەمانێ خوە دەرکەڤیت، کو بەری چەند رۆژان وی رەخنە ل کریارێن لەشکرێ تورکیا ل هەمبەر وەلاتیێن کورد گرتبوون، ئەو یەک ژی نیشا ددەت پارتا کۆماری وەکو مەزنترین پارتا ئۆپۆزسیۆنێ ل تورکیا د ناڤ قەیرانەکا گەلەک مەزن دایە، بەری نها کلچدار ئۆغلۆیی گەلەک سۆز دانە خەلکێ تورکیا، لێ هەلوەستێ ڤێ دووماهیێ یێ پارتا کۆماریا گەل و سەرۆکێ وێ سەلماند ئەو نەشێن چو گوهۆڕینان ل تورکیا بکەن، بەلکو پێدڤیا جەهەپێ بخوە ب گوهۆرینێن مەزن هەیە و گۆت: (پارتا کۆماری د هەلبژارتنان دا گەلەک سۆز دانە خەلکی، لێ مخابن نەشیان ببنە جهێ باوەریا خەلکی، ژ بەر هندێ ژی د هەلبژارتنان دا ئۆپۆزسیۆنا تورکیا ب تایبەتی ژی پارتا کۆماری یا سەرکەفتی نەبوو، هەلوەستێ نها یێ پارتا کۆماریا و سەرۆکێ وێ بێگومان دێ کاریگەریەکا خوە یا خراب ل خەلکێ تورکیا کەت، چونکی ئەو نەشێن خوەدان ل دەنگ و ئیرادا خەلکی دەرکەڤن).
ناڤهاتی سەبارەت ب رەوشا نها یا تورکیا و هەلوەستێ حوکمەتێ ل دۆر پرسا کوردی ژی راگەهاند، حوکمەتا نها دڤێت ب هەر رەنگێ هەی پێگەهێ خوە بهێز بکەت و دیسان ل سەر بنەمایێ دوژمناتیا کوردان سیاسەتێ دکەن، چو بەرنامێ حوکمەتێ بۆ چارەسەرکرنا پرسا کوردی ل تورکیا نینە، ئەردۆغان دبێژیت وان پرسا کوردی چارەسەر کرینە، لێ هەر رۆژ لاوێن کورد دەستەسەر دکەن، زۆرداریا ل سەر کوردان رۆژ ب رۆژێ زێدەتر دبیت و ئەو یەک ژی نیشا ددەت دەستهەلاتا نها وانە ژ ئەزموونێن بۆری وەرنەگرتیە، چونکی ب شەڕی و ئۆپەراسیۆنێن سەربازی چو پرسەک ناهێتە چارەسەرکرن و گۆت: (هەتا پرسا کوردی ل تورکیا نەهێتە چارەسەرکرن ژی دێ قەیرانا نها بەردەوام بیت، قەیرانا ئابووری و قەیرانێن دی هەمی ژ بەر هندێ نە کو هەتا نها پرسا کوردی نەهاتیە چارەسەرکرن، ژ بەر پرسا کوردی گەلەک پرسێن دی ژی هەتا نها ل تورکیا نەهاتینە چارەسەرکرن و مخابن حوکمەتێ چو پرۆژە بۆ چارەسەرکرنا پرسا کوردی و قەیرانا ئابووری ژی نینن).
ئەندامێ پەرلەمانێ تورکیا ئەو یەک ژی دیار کر، مخابن پەرلەمانێ تورکیا کەفتیە دەستێ ئاکپارتیێ و ئیرادا خوە ژ دەست دایە، پەرلەمانتارێن ئۆپۆزسیۆنێ ژی ل هەمبەر رەوشا نها یا خراب ل تورکیا خوە بێدەنگ کرینە و راستیێن هەی بۆ رایا گشتی ئاشکرا ناکەن، قەیرانا ئابووری و قەیرانێن دی هەموو بەرهەمێ ڤێ بێدەنگیێ نە، دڤێت ئەندامێن پەرلەمانی ب ئەرکێ خوە رابن، مخابن تشتەک وەسا نینە و کەس نەشێت داخوازا لێپرسینێ ژ بەرپرسێن نها بکەت، هەکە رەوش وەکو نها بەردەوام بیت بێگومان دێ تورکیا بەر ب چارەنڤیسەکێ نەدیار ڤە چیت.
ئەو یەک د دەمەکێ دایە کو بەری چەند رۆژان سەزگین تانری کولو ئەندامێ پەرلەمانێ تورکیا یێ سەر ب پارتا کۆماریا گەل د داخۆیانیەکێ دا دیار کربوو، لەشکرێ تورکیا ل باکورێ کوردستانێ زۆرداریێ ل وەلاتیێن کورد دکەن و هەتا نها گەلەک وەلاتیێن کورد بێی چو ئەگەرەکێ ب دەستێ لەشکرێن تورکیا هاتینە کوشتن و دڤێت پەرلەمان ب ئەرکێ خوە رابیت و دەست ب ڤەکۆلینان بکەت دا راستیێن هەی بۆ خەلکی بهێنە ئاشکرا کرن.
پشتی هەلوەستی وی پەرلەمانتاری حزبا وی ئانکۆ پارتا کۆماری خوەدان ژێ دەرنەکەفتن و هەلوەستێ وی ژی رەخنە کرن، ژ بەر هندێ ژی گەلەک ژ سیاسەتمەدار و نڤیسەرێن تورکیا هەلوەستێ پارتا کۆماری ب توندی رەخنە کرن و دیار کرن، پارتا کۆماری ب هەلوەستێ خوە یێ نها نەشێت نوونەراتیا خەلکی بکەت و هەکە نها ل تورکیا هەلبژارتن بهێنە کرن دیسان پارتا کۆماری نەشێت د هەلبژارتنان دا یا سەرکەفتی بیت، چونکی باوەریا خەلکێ تورکیا ب سیاسەتا پارتا کۆماری نەمایە.
