دڤێت کورد ژی وەکو هەموو گەلێن دی بگەهنە مافێن خوە
ب پشکداریا هژمارەک ژ پارت و هێزێن سیاسی یێن باکورێ کوردستانێ ل باژێرێ ئامەدێ کۆنفرانسێ لۆزانێ برێڤە چوو و تێدا پشکداربوویێن کۆنفرانسێ دیار کرن، دڤێت ل تورکیا رێز ل مافێن کوردان بهێتە گرتن و دڤێت ئێدی کورد خوە برێڤە ببەن، هەتا ئەو یەک نەهێتە کرن پرسا کوردی و پرسێن دی یێن تورکیا ژی ناهێنە چارەسەرکرن.
ب پشکداریا هژمارەک بەرچاڤ ژ پارتی و هێزێن سیاسی یێن کوردی ل باژێرێ ئامەدێ کۆنفرانسێ لۆزانێ هاتە سازکرن و د کۆنفرانسێ دا سەرکردێن پارتێن سیاسی یێن کوردی دیار کرن، ب سالانە داگیرکەرێن کوردستانێ بزاڤا ژناڤبرنا گەلێ کورد دکەن، هەموو رەنگێن توندوتیژیێ ل دژی گەلێ کورد هاتە بکارئینان و ئەڤرۆکە پتر ژ هەر دەمەکێ بۆ داگیرکەرێن کوردستانێ هاتە سەلماندن کو کورد ژناڤ ناچن و ژ بەر هندێ ژی دڤێت ل تورکیا پرسا کوردی ئێدی بهێتە چارەسەرکرن.
پشکداربوویێن کۆنفرانسێ ئەو یەک ژی دیار کرن، کو دڤێت کوردان ژی ئەو مافە هەبیت بشێن خوە برێڤە ببەن، ژ بۆ هندێ ژی دڤێت گوهۆڕین د دستوورێ نها یێ تورکیا دا بهێتە کرن و دڤێت دانپێدان ب مافێن گەلێ کورد بهێتە کرن، چونکی دستوورێ نها بخوە بوویە ئاستەنگیەکا مەزن ل هەمبەر مافێن کوردان، ژ بەر کو د دستووری دا هەبوونا کوردان هاتیە رەتکرن و ئەو یەک ژی ئاریشەکا گەلەک مەزنە.
چاڤدێرێن سیاسی ژی دیار دکەن، دڤێت نها پتر ژ هەر دەمەکێ کورد ل باکورێ کوردستانێ کار بۆ ئاڤاکرنا بەرەیەکێ نەتەوەیی بکەن، چونکی ناکۆکیێن گەلەک مەزن د ناڤبەرا هێز و ئالیێن سیاسی یێن باکورێ کوردستانێ دا هەنە، د رەوشا نها دا بزاڤا سیاسی یا کوردی ل تورکیا و باکورێ کوردستانێ نەشیایە وەکو پێدڤی نوونەراتیا گەلێ کورد بکەت، ژ بەر هندێ ژی د هەلبژارتنێن هەری دووماهیێن یێن پەرلەمانێ تورکیا دا رێژەیا دەنگێن کوردان گەلەک کێم بوو، چونکی هێزا هەری کاریگەر ئانکۆ هەدەپە نوونەراتیا کوردان ناکەت و کەفتیە ژێر کاریگەریا چەپێن تورک، ئەو یەک ژی کاریگەریا خوە ل دەنگێن کوردان کریە، ژ بەر هندێ ژی دڤێت هەر زوو هەموو پارت و هێزێن سیاسی یێن باکورێ کوردستانێ ل سەر بنەمایێ بەرژەوەندیێن نەتەوەیی یێن گەلێ کوردستانێ پێکڤە بەرەیەکێ نەتەوەیی ئاڤا بکەن.
ل گۆر باوەریا چاڤدێرێن سیاسی یێن کورد ل باکورێ کوردستانێ نها ئاستەنگیێن مەزن ل هەمبەر پەروەردا ب زمانێ کوردی هەنە، دڤێت ب رێیا خەباتا سیاسی دەستهەلاتا نها یا تورکیا بهێتە نەچارکرن کار بۆ چارەسەرکرنا پرسا کوردی ل تورکیا بکەت، چونکی هەتا پرسا کوردی ل تورکیا نەهێتە چارەسەرکرن گەلەک پرسێن دی ژی هەنە دێ وەکو خوە مینن و ناهێنە چارەسەرکرن و دێ قەیرانا ئابووری و گەلەک قەیرانێن دی ل تورکیا بەردەوام بن.
