کۆریا باشۆر: پارەیێن ئیرانێ بۆ وەلاتەکێ دی هاتنە هنارتن
وەزارەتا دەرڤە یا کۆریا باشور راگەهاند، شەش ملیار دۆلار پارێن ئیرانێ بەری نها ل وەلاتێ وان هاتبوونە بلۆکەکرن، لێ دوهی ئەو پارە بۆ وەلاتەکێ دی هاتنە هنارتن و پاشی دی گەهیتە دەستێ ئیرانێ.
ئەو یەک د دەمەکێ دایە کو ئیرانێ ٥ گرتیێن ئەمریکی ئازاد کرن و ل هەمبەر ئازادکرنا وان ژی ئەمریکا بریار دا پارێن ئیرانێ یێن ل کۆریا باشور بۆ وی وەلاتی ڤەگەرینیت و چاڤدێرێن سیاسی ژی دیار دکەن رێککەفتنەکا نهێنی د ناڤبەرا ئەمریکا و ئیرانێ دا هەیە و ئەو یەک ژی دشێت ئەنجامێن خوە یێن گەلەک خراب بۆ هەڤپەیمانێن ئەمریکا ل دەڤەرێ هەبیت، چونکی ترسەکا مەزن یا هەی ئیران وی پاری بدەتە گرۆپێن چەکدار و وان ل دژی بەرژەوەندیێن ئەمریکا و هەڤپەیمانێن وێ ل رۆژهەلاتا ناڤین بکار بینیت.
ل ئالیێ دی دوهی ناسر کەنعانی پەیڤدارێ وەزارەتا دەرڤە یا ئیرانێ ژی راگەهاند، ئیران ل گۆر رێککەفتنا ل گەل ئەمریکا ٥ گرتیێن ئەمریکی ئازاد کرینە و ل هەمبەر دا دڤێت ئەمریکا ژی سۆزێن خوە بجه بینیت، دڤێت ئەمریکا هەموو سزایێن ئابووری یێن ل سەر ئیرانێ راکەت.
