تورکیا بزاڤان دکەت ل سووریێ خوە نێزیکی ئەمریکا بکەت
چاڤدێرەکێ سیاسی دیار دکەت، سراتیژیا تورکیا ل سووریێ هەتا نها یا سەرکەفتی نەبوویە و نها ژی ناکۆکیێن مەزن د ناڤبەرا رۆسیا و تورکیا دا هەنە، ژ بەر هندێ ژی تورکیا دڤێت خوە نێزیکی ئەمریکا بکەت و ئەو یەک دشێت بۆ کوردێن رۆژئاڤایێ کوردستانێ مەترسیێن خوە یێن مەزن هەبیت.
حەمید کۆبانی چاڤدێرێ سیاسی یێ رۆژئاڤایێ کوردستانێ راگەهاند، تورکیا هەتا نها ل سووریێ نەشیایە بگەهیتە ئارمانجێن خوە، نها رەوشەکا نوو ل سووریێ هاتیە پێش، چونکی رۆسیا ب هەموو رەنگەکێ کار دکەت دا تورکیا و ئەمریکا هێزێن خوە ژ سووریێ ڤەکێشن، تورکیا ژی بەرهەڤ نینە بێی مەرج هێزێن خوە ژ سووریێ ڤەکێشیت، حەفتیا بۆری فرۆکێن شەری یێن رۆسیا ل ئدلبێ ئێرشی هێزێن سەر ب تورکیا کرن و گەلەک چەکدارێن سەر ب تورکیا هاتنە کوشتن، رۆسیا دڤێت ب هەر رەنگێ هەی تورکیا ئدلبێ رادەستی رژێما بەشاری بکەت و ژ بۆ هندێ ژی رۆژ ب رۆژێ ئێرشێن رۆسیا ل دژی گرۆپێن چەکدارێن سەر ب تورکیا زێدەتر دبیت، ژ بەر هندێ ژی تورکیا یا تەنگاڤە و دڤێت ستراتیژیا خوە ل سووریێ بگوهۆڕیت.
ناڤهاتی ئەو یەک ژی دیار کر، تورکیا دزانیت ئاریشەکا مەزن نها ل سووریێ د ناڤبەرا هێزێن سەر ب ئیرانێ و ئەمریکا دا هەیە، بەری نها چەکدارێن سەر ب ئیرانێ ئاریشە ژی بۆ ئەمریکا دروست کرن، تورکیا دڤێت چەکدارێن سووری یێن کو ب سالانە تورکیا هاریکاریا وان کریە بکەتە خزمەتا ئەمریکا دا و ل هەمبەر دا ئەمریکا ژی رێ بدەت دا تورکیا دەست ب ئۆپەراسیۆنەکا نوو ل باکورێ سووریێ و رۆژئاڤایێ کوردستانێ بکەت، تورکیا ژ بۆ هندێ ژی دەست ب بزاڤێن مەزن کریە، لێ هەتا نها دیار نینە کا دێ بەرسڤا ئەمریکا چ بیت، لێ رەنگە ئەمریکا وەسا زوو داخوازیێن تورکیا قەبوول نەکەت، لێ ئەو یەک رامانا هندێ ژی نادەت دێ تورکیا چ نەکەت، چونکی تورکیا دڤێت ستراتیژیا خوە ل سووریێ بگوهۆڕیت دا بشێت پێگەهێ خوە ل سووریێ بهێز بکەت، چونکی نها ناکۆکیێن گەلەک مەزن د ناڤبەرا بەرژەوەندیێن رۆسیا و تورکیا دا هەنە.
ئەو یەک د دەمەکێ دایە بەری دەمەکێ فەرماندارەکێ ئەمریکا ل سووریێ دیار کربوو، رۆسیا، ئیران و رژێما بەشاری دخوازن ب هەر رەنگێ هەی هێزێن ئەمریکا ل سووریێ دەرخینن، ئەو یەک ژی ب چو رەنگەکێ ناهێتە قەبوول کرن، چونکی مەترسیا داعشێ و رێکخستنێن دی یێن تیرۆرستی ل سووریێ یا هەی، تیرۆر مەترسیەکا گەلەک مەزنە ل سەر بەرژەوەندیێن ئەمریکا، ژ بەر هندێ ژی هەتا رەوشا سووریێ یا ئارام نەبیت و دووماهی ب تیرۆرێ نەهێت ئەمریکا یا بەرهەڤ نینە هێزێن خوە ژ ئاخا سووریێ ڤەکێشیت.
