ئیران: پێویستیا مە ب رێککەفتنەکا نوو یا هەی
وەزیرێ دەرڤە یێ ئیرانێ پشتی هەڤدیتنا ل گەل سکرتێرێ گشتی یێ نەتەوەیێن ئێکگرتی د داخۆیانیەکێ دا راگەهاند، هەتا نها پشکەک ژ رێککەفتنا وان ل گەل ئەمریکا بجه هاتیە و ئەو یەک ژی گەلەک گرنگە، وەکو ئیران وان دڤێت رێککەفتنا ئەتۆمی ل گەل ئەمریکا نوو بکەن، هەکە ئەمریکا یا بەرهەڤ بیت رێککەفتنا ئەتۆمی بهێتە نووکرن، ئیران یا بەرهەڤە و نووکرنا رێککەفتنا ئەتۆمی د بەرژەوەندیا هەر دو وەلاتان دایە.
حسێن ئەمیر عەبدوللاهیان ئەو یەک ژی دیار کر، هێشتا ئەمریکا ب فەرمی پشتەڤانیا خوە بۆ نووکرنا رێککەفتنەکا نوو یا سەبارەت ب بەرنامێ ئەتۆمی یێ ئیرانێ دیار نەکریە، لێ هندەک ئاماژە هەنە کو ئەمریکیان ژی دڤێت سەبارەت ب بەرنامێ ئەتۆمی ل گەل ئیرانێ دەست ب دانوستاندنان بکەن.
ئەو یەک د دەمەکێ دایە بەری دو رۆژان ئانتۆمی بلینکن وەزیرێ دەرڤە یێ ئەمریکا ژی راگەهاند، ئیران هەتا نها یا بەرهەڤ نینە سەبارەت ب بەرنامێ خوە یێ ئەتۆمی هاریکاریا ئاژانسا جیهانی یا ئەتۆمی بکەت، هەتا ئیران راستیێن هەی بۆ ئاژانسا جیهانێ ئاشکرا نەکەت ئەمریکا ژی ل گەل تەهرانێ سەبارەت ب بەرنامێ ئەتۆمی چو دانوستاندنان ناکەت، هەکە هەلوەستێ ئیرانێ وەکو نها بیت ئەمریکا دێ سزایێن دژوار ل سەر وی وەلاتی ژی سەپینیت.
