دڤێت تورکیا و شام دەست ب قۆناغەکا نوو بکەن
وەزیرێ دەرڤە یێ رۆسیا راگەهاند، قەیرانا سووریێ دڤێت دوور ژ شەری بهێتە چارەسەرکرن، نها بابەتێ ڤەکێشانا هێزێن تورکیا ژ ئاخا سووریێ گەلەک گرنگە، ژ بۆ هندێ ژی وەکو رۆسیا ئەو پشتەڤانیێ ل دەستپێکرنا قۆناغەکا نوو د ناڤبەرا تورکیا و شامێ دا دکەن، دڤێت تورکیا هندەک ژ داخوازیێن سووریێ قەبوول بکەت.
سیرگێی لاڤرۆڤ وەزیرێ دەرڤە یێ رۆسیا د داخۆیانیەکێ دا بۆ دەزگەهێن راگەهاندنێ دیار کر، وەکو رۆسیا ئەو کار بۆ چارەسەریەکا سیاسی ل سووریێ دکەن، ژ بۆ ڤێ یەکێ ژی گەلەک یا گرنگە تورکیا و سووریێ دەست ب قۆناغەکا نوو بکەن، مە دڤێت هەر دو وەلات دەست ب دانوستاندنان بکەن، بەری نها مە پشتەڤانیا خوە بۆ هەر دو وەلاتان ژی دیار کریە، لێ مخابن هەتا نها ژی چو دانوستاندنێن فەرمی د ناڤبەرا تورکیا و سووریێ دا نینن، چونکی بابەتێ ڤەکێشانا هێزێن تورکیا ژ ئاخا سووریێ نها گەلەک گرنگە، مخابن هەتا نها ئەنقەرە بەرهەڤ نینە هێزێن خوە ژ ئاخا سووریێ ڤەکێشیت و گۆت: (دڤێط تورکیا و سووریێ دەست ب قۆناغەکا نوو بکەن، دڤێت د دەمەکێ هەر نێزیک دا هەر دو وەلات پرسێن هەی د ناڤبەرا خوە دا چارەسەر بکەن، وەکو رۆسیا ئەو پشتەڤانیێ ل دەستپێکرنا قۆناغەکا نوو د ناڤبەرا هەر دو وەلاتان دا دکەن، دڤێت تورکیا ژی هەلوەستێ خوە ل هەمبەر سووریێ بگوهۆڕیت و ل گۆر راستیا نها بزاڤا بکەت).
وەزیرێ دەرڤە یێ رۆسیا ئەو یەک ژی دیار کر، ئێدی دڤێت سووریێ ب رۆلێ خوە یێ گرنگ رابیت، دڤێت پەیوەندیێن سووریێ ل گەل هەموو وەلاتێن عەرەبی ژی ئاسایی بیت، چونکی هەتا ئالۆزیێن ل سووریێ بەردەوام بن دێ ئەو یەک کاریگەریا خوە ل رەوشا وەلاتێن دی ژی کەت، ژ بەر هندێ وەکو رۆسیا ئەو دەمەکە کار دکەن دا قەیرانا سووریێ دوور ژ شەری و ب رێیا دانوستاندنان بهێتە چارەسەرکرن، ژ بۆ هندێ ژی گەلەک گرنگە تورکیا و سووریێ پرسێن هەی د ناڤبەرا خوە دا چارەسەر بکەن، دڤێت پرسا پەنابەرێن سووریێ ئەوێن نها ل تورکیا نە ژی بهێتە چارەسەرکرن.
ئەو یەک د دەمەکێ دایە بەری دو رۆژان وەزیرێ بەرگریێ یێ تورکیا ژی راگەهاند، هەتا مەترسی ل سەر سنۆرێن سووریێ بۆ تورکیا هەبن، ئەنقەرە یا بەرهەڤ نینە هێزێن خوە ژ ئاخا سووریێ ڤەکێشیت، چونکی مەترسیێن گەلەک مەزن ل سەر ئاسایشا تورکیا هەنە، ژ بەر هندێ ژی تورکیا نەچارە بۆ هەر پێشهاتەکێ د ئامادەباشیێ دا بیت، هەتا رەوشا سووریێ ئارام نەبیت و گرۆپێن تیرۆرستی ژی ل سووریێ بمینن، تورکیا ژی نەشێت هێزێن خوە ژ ئاخا سووریێ ڤەکێشیت.
