كەنگی دروستە گۆڕ بهێتە ڤەكرن؟
سەباح زوهێر:
پارێزەرەكی دیار كر كو ل دووڤ قانوونێ دادوەر دشێت مۆلەتێ بۆ ڤەكرنا گۆڕی بدەت بۆ حالەتێن پێدڤی، مەلایەك ژی دبێژیت چ راستی بو هندێ نینە دەنگ ژ گۆڕێ كەسەكێ مری بهێت و د ئایینی ژی دا بو هندەك حالەتێن دیار كری بتنێ ماف هەیە گۆڕ بهێتە ڤەكرن.
پارێزەر ئەكرەم باشقالی لدور ڤەكرنا گۆڕی بۆ ئەڤرۆ دیار كر كو هەكە گومان ژ مرنا كەسێ مری هەبیت و مرنەكا سروشتی نەبیت یان گومان هەبیت ئەو كەسێ مری هاتبیتە كوشتن یان ژەهر كرن، هینگێ مافێ ڤەكرنا گوری هەیە ژ بۆ هندێ داكو راستیا مرنا وی كەسی و ئەگەر بهێتە دیار كرن و گۆت: (د قانوونا عێراقێ دا د ماددێ 71ێ دا ژ قانوونا بنەمایێن دادگەهكرنا سزای ئاماژە پێكریە).
پارێزەری دیار كر ژی كو هەتا گۆڕەك بهێتە ڤەكرن دڤێت مۆلەت ژ دادوەرێ ڤەكولینێ بهێتە وەرگرتن، ئەو ژی هەكە حالەتێ مری بخوازیت داداوەرێ ڤەكولینێ دشێت مولەتێ بدەت بۆ مەبەستا پشكنینا تەرمێ مری و گۆت: (لێ پێدڤیە ل دەستپێكێ ژ ڤەكرنا گۆڕی پشت راست بن كو ئەو گۆڕێ دهێتە ڤەكرن یێ وی كەسیە یان نە، هەروەسا پێدڤیە كەسەكێ شارەزا یان نوژدارەكێ تایبەتمەند ب ڤی كاری رابیت بۆ زانینا ئەگەرێن مرنا كەسی و د ڤەكولینێ دا بهێنە دیار كرن و كەس و كارێن نزیكی مری ل سەر گۆڕی ئامادە ببن ل دەمێ گۆڕ دهێتە ڤەكرن).
سەبارەت ژلایێ قانوونیڤە چ سزایەك بۆ وان كەسان هەیە یێن بێ رەزامەندی گۆڕەكی ڤەدكەن پارێزەری دا زانین كو قانوونا دانەرێ عێراقێ یا سزادانا عێراقێ یا هژمارە 111ێ یا سالا 1969 بەحس ل زێدەگاڤیا ل سەر پیروزیێن مریان و گۆڕێن وان و دەستكاری ل تەرمێن وان كریە ئەوژی ماددەیێن 373 و 374 كو سزایێ وان زێدەتر نینە ژ دوو سالان ب زیندانكرنێ یان ب ملیۆن دینارا دێ هێتە سزادان.
مەلا عەبدلواحد شێخ جامی دیار كر كو دەمێ مریەك هاتە ڤەشارتن ژلایێ ئاییی ڤە نابیت گۆڕێ مری بهێتە ڤەكرن تنێ بۆ حالەتێن پێدڤی نەبیت وەكی، هەكە ئەو كەسە نە هاتبیتە شوشتن، چونكی شوشتنا مری فەرزە، یان هەكە پشتی چەندین سالان ئەو گۆڕ كەفتە رێكەكێ دا یان جهێ پرۆژەكێ، چونكی حالەتەكێ نەچاریە، هەروەسا دەمێ ژنەكا دو گیان دهێتە ڤەشارتن و گومان ل سەر زاروكی هەبن كو یێ ساخە دڤان حالەتاندا ئایینی رێك یا دای كو گۆڕ بهێتە ڤەكرن، چونكی حالەتێن نەچارینە.
مەلای ئەو چەندە ژی دیار كر هەكە كەسەك مر و هاتە ڤەشارتن د گۆڕی دا، چ راستی بۆ هندێ نینە كو دەنگەك ژ گۆڕی بهێت د ئایینی دا ئەڤ تشتە نینە و گۆت: (ب دیتنا من ئەڤە واسواسە و هزرن، ئەڤ كەسێ ل فەیدیێ ژی ئەڤە 40 روژە د گۆڕی دا بێ خوارن و ڤەخوارن و ئوكسجین، چاوا دێ دەنگ ژ گۆڕی هێت، لەوا ب دیتنا من چ تشتێ وەسا نینە و كەس نامینیتە ساخ د گوری دا پشتی هندە روژان).
