پەقینا ل ئەنقەرە دێ زیانەکا مەزن گەهینتە خەباتا کوردان ل تورکیا
چاڤدێرێن سیاسی ل تورکیا و باکورێ کوردستانێ دیار دکەن، پەقینا ڤێ دووماهیێ ل ئەنقەرە دێ زیانەکا خوە یا گەلەک مەزن بۆ خەباتا گەلێ کورد ل تورکیا و باکورێ کوردستانێ هەبیت، چونکی هەموو رەنگێن توندوتیژیێ زیانا خوە بۆ خەباتا رەوا یا گەلێ کورد ل تورکیا و باکورێ کوردستانێ یا هەی.
محەمەد بایرام چاڤدێرێ سیاسی ل باکورێ کوردستانێ راگەهاند، مخابن پەقینا ڤێ دووماهیێ کارەکێ گەلەک خراب بوو، پەکەکە ب کارێن وەسا زیانێ دگەهینتە خەباتا گەلێ کورد، چونکی ب سالانە کورد خەباتێ دکەن دا بگەهنە مافێن خوە یێن رەوا، هەتا نها ب هزاران لاوێن کورد جانێ خوە گوری دۆزا رەوا یا گەلێ کورد کرینە، لێ مخابن کریارێن تیرۆرستی و توندوتیژی د بەرژەوەندیا دۆز رەوا یا گەلێ کورد دا نینن و ئەو یەک ب تەمامی د بەرژەوەندیا دەستهەلاتا نها یا تورکیا دایە و گۆت: (ب سالانە بەرپرسین تورکیا دبێژن ئێدی پرسا کوردی ل تورکیا نەمایە و پرسا تیرۆرێ یا هەی، مخابن پەقینا ڤێ دووماهیێ ژی د بەرژەوەندیا دەستهەلاتێ دایە، نابیت چو کوردەک کریارێن وەسا بکەت، کریارێن وەکو یا ئەنقەرە دێ وەسا کەت دا د ئاستێ جیهانی دا کەس پشتەڤانیێ ل داخوازیێن کوردان نەکەت، پرسا کوردی پرسا چەند ملیۆن وەلاتیێن کوردە ل تورکیا و باکورێ کوردستانێ، ب چالاکیێن وەکو یا ئەنقەرە چو دەمەکێ پرسا کوردی چارەسەر نابیت، ژ بەر هندێ ژی یا ڤێ دووماهیێ پەکەکێ کری دێ زیانەکا خوە یا گەلەک مەزن بۆ خەباتا گەلێ کورد ل تورکیا و باکورێ کوردستانێ هەبیت).
حەسەن بیلدرجی چاڤدێرێ سیاسی یێ کورد ل ئۆرۆپا ژی راگەهاند، هەر هێزەکێ پەقینا ل ئەنقەرە کربیت مخابن دێ بێژم خزمەتا دەولەتا تورکیا کر، چونکی ب سالانە ئەم دبێژین ل تورکیا زۆرداری ل کوردان دهێتە کرن و کورد بووینە قوربانی، دڤێت هەموو هێزێن کوردی ل تورکیا کار بۆ بدەستڤەئینانا پشتەڤانیا جیهانی بۆ مافێن کوردان بکەن، نابیت ب چو رەنگەکێ ناڤێ تیرۆرێ ل سەر بزاڤەکا کوردی هەبیت، مخابن پەقینا ڤێ دووماهیێ یا ل ئەنقەرە کارەکێ گەلەک خراب بوو، ب توندوتیژیێ ب تایبەتی ژی ب کریارێن وەکو یا ل ئەنقەرە چو دەمەکێ کورد ناگەهنە مافێن خوە، پرسا کوردی ب کریارێن خوەکوژی ناهێتە چارەسەرکرن، ئەو یەک د بەرژەوەندیا دەستهەلاتێ دایە و گۆت: (نها بەرپرسێن تورکیا بۆ وەلاتێن ئێکەتیا ئۆرۆپا و ئەمریکا دبێژن، ئەڤە ل تورکیا پرسا تیرۆرێ هەیە، پرسا کوردی نینە، وی دەمی بێگومان ئەمریکا و وەلاتێن ئێکەتیا ئۆرۆپا ژی وەکو پێویست پشتەڤانیێ ل داخوازیێن کوردان ناکەن، مخابن کریارا ڤێ دووماهیێ یا ل ئەنقەرە شاشیەکا گەلەک مەزن بوو و ئەز وەسا دبینم دێ بیتە ئەگەرێ روودانێن گەلەک خراب، تورکیا دێ جارەکا دی ب بەهانا شەرێ ل دژی تیرۆرێ دەست ب ئۆپەراسیۆنەکا نوو ل رۆژئاڤایێ کوردستانێ کەت و هەروەسا دێ ئێرشێن ئەسمانی ل هەرێما کوردستانێ ژی دژوارتر لێ کەت، ئانکۆ ب کورتی دیسان دێ زیان گەهیتە کوردان و دێ کورد بنە قوربانی، ژ بەر هندێ ژی ئەز دبێژم کریارا ل ئەنقەرە شاشیەک گەلەک مەزن بوو کو پەکەکێ کری).
ل ئالیێ دی چیده‌م کلچگوون ئوچار هه‌ڤسه‌رۆکا پارتا چه‌پ یا که‌سک د پرێس کۆنفرانسەکێ دا ل په‌رله‌مانێ تورکیا راگه‌هاند کو ئه‌و وه‌ک پارتا چه‌پ یا که‌سک ل دژی هه‌موو کریارێن توندوتیژیێ نه و گۆت: (ئه‌م وه‌ک نوونه‌رێن سیاسه‌تا دیموکرات، کریارا خوه‌کوژیێ یا ل به‌رده‌م وه‌زاره‌تا ناڤخوە یا تورکیا رەت دکەین و ب چو رەنگەکێ کریارێن وه‌سا قه‌بول ناکەین. چونکی چو پرسەک ل تورکیا ب توندوتیژیێ ناهێتە چارەسەرکرن، پێویستا تورکیا ب ئاشتیێ هەیە، دڤێت پرسا کوردی و هەموو پرسێن دی ل تورکیا دوور ژ شەڕی و توندوتیژیێ بهێنە چارەسەرکرن، وەکو پارتا چەپ یا کەسک ئەم پەقینا ل ئەنقەرە ب توندی رەت دکەین و داخواز دکەین هەموو ئالیێن سیاسی کار بۆ دیالۆگێ و دەستپێکرنا قۆناغەکا نوو بکەن، کو تێدا پرسا کوردی و هەموو پرسێن دی دوور ژ شەڕی و توندوتیژیێ بهێنە چارەسەرکرن).
هه‌ڤسه‌رۆکا پارتا چه‌پ یا که‌سک د ئاخڤتنا خوه دا داخواز ژ په‌رله‌مانێ تورکیا ژی کر کو ب رۆلێ خوە رابیت و کار بۆ چارەسەرکرنا پرسا کوردی ل تورکیا بکەت و گۆت: (گه‌له‌ک ئاشکرایه کو هه‌تا پرسا کوردی نه‌هێته چارەسەرکرن ئارامی جێگر نابیت و هێڤیدارم په‌رله‌مانێ تورکیا بۆ چارەسەرکرنا پرسا کوردی یا پێدڤی بکەت و دەست ب قۆناغەکا نوو بهێتە کرن، پێویستیا تورکیا ب ئاشتیێ یا هەی، ئەم جارەکا دی وەکو پارتا چەپ یا کەسک دیار دکەین، ب شەڕی و توندوتیژیێ پرسا کوردی و پرسێن دی یێن ل تورکیا ناهێنە چارەسەرکرن، دڤێت هەموو هێز و ئالیێن سیاسی ل تورکیا پێکڤە دەست ب قۆناغەکا نوو بکەن، دڤێت ب جهێ شەڕی هەموو ئالی کار بۆ ئاشتیێ بکەن، ب رێیا دانوستاندنان دێ هەموو پرس هێنە چارەسەرکرن، ژ بەر هندێ ژی ئەم دبێژن کریارا خوەکوژی یا ڤێ دووماهیێ ل ئەنقەرە خزمەتا پرسا کوردی و چارەسەریا پرسێن دی یێن ل تورکیا ناکەت و دێ بیتە ئەگەرێ دەستپێکرنا قۆناغەکا دی یا شەڕی و ئالۆزیان، کو ئەو یەک ژی د بەرژەوەندیا گەلێ کورد و ئالیێن دیموکرات دا نینە).
هەژی ئاماژەپێدانێ یە، پشتی پەقینا چەند رۆژێن بۆری ل ئەنقەرە پارتا کارکه‌رێن کوردستانێ به‌رپرسیاریا خوه یا د چالاکیا خوه‌کوژیێ یا ل به‌رده‌م ئاڤاهیا وه‌زاره‌تا ناڤخوە دا راگه‌هاند. کریارا خوه‌کوژیێ ژ ئالیێ پرانیا وه‌لاتێن جیهانێ ڤه هاته شه‌رمه‌زار کرن، گەلەک هێز و ئالیێن سیاسی یێن کوردستانی ژی کریارا ل ئەنقەرە ب توندی شەرمزار کرن و دیار کرن، ئەو یەک د خزمەتا دۆزا رەوا یا گەلێ کورد ل تورکیا دا نینە و دێ زیانێن خوە یێن گەلەک مەزن بۆ خەباتا گەلێ کورد هەبیت.
