شەرێ ئوكرانیا و رووسیا و ئەرمینیا نیڤەكا ئێزدیێن ئوكرانیا كۆچبەركرینە
دووڤچوون:
راوێژكارەكێ جڤاتا رۆحانیا ئێزدیان د چاڤپێكەڤتنەكێدا بەحسێ چوونا شاندەكێ ئێزدیان و میر حازم تەحسین بەگ بۆ وەلاتێ ئەرمینیا دكەت و دبێژیت: ژ ئەگەرێ شەرێ دناڤبەرا ئوكرانیا و رووسیا و ئەرمینیا نیڤەكا ئێزدیان وەلاتێ ئوكرانیا بجههێلاینە و كۆچبەری وەلاتێن ئەوروپێ بووینە و پتر ژ 100 سالان ئێزدی كۆچبەری وەلاتێ ئەرمینیا بووینە و میرێ ئێزدیان داخواز ژ ئێزدیێن ئەرمینیا كر سەرەدانا پەرستگەها لالش ل هەرێما كوردستانێ بكەن».
خالد نەرمۆ، راوێژكارێ جڤاتا رۆحانیا ئێزدیان راگەهاند، بۆ پاراستنا زمان و كەلتور و دابونەریت و ئولا خۆ دێ ئێزدیێن ئەرمینیا ل سەر داخوازیا میرێ ئێزدیان میر حازم تەحسین بەگ سەرەدانا پەرستگەها لالش كەن، ئەڤە پتر ژ 100 سالان ئێزدی كۆچبەری وەلاتی ئەرمینیا بووینە و خەلكێ ئەرمینیا گەلەك ب گەرمێ پێشوازیا میری كرن و بەحسێ رێكخستنا ئێزدیان ل وەلاتێ ئەرمینیا هاتە كرن و ئێزدی وەكو هەر وەلاتیەكێ ئەرمەنی د ئازادن بۆ گێرانا رێ و رەسمێن خۆ یێن ئایینی.
خۆیا ژی كر، كۆچبەریا ئێزدیان ژ ئەرمینیا ژ میژە دەستپێكریە، ئێزدی ژ وەلاتی ئەرمینیا چووینە رۆسیا و چەند دەولەتان، هژمارا ئێزدیان ل سالێن هەشتێیان گەهشتە 60 هزار كەسێن ئێزدی و ل ئەرمینیا بوون، لێ نوكە هژمارا ئێزدیان ل ئەرمینیا كێمبوویە و نوكە هژمارا ئێزدیان ل ئەرمینیا دگەهیتە نێزیكی 40 هزار كەسێن ئێزدی و ل وەلاتێ ئەرمینیا بەلاڤبووینە ل سەر روسیا و ئوكرانیا و جورجیا و گەلەك دەولەتان هەتا فەرەنسا و ئەلمانیا و ئەمریكا».
ئاشكرا ژی كر، ئیزدیێن ل وەلاتێ ئوكرانیا دژین سەرەدانا میرێ ئێزدیان كرن و داخواز ژ میری كرن بچیتە ئوكرانیا و رەوشا ئێزدیان ببینت، نێزیكی 10 هزار ئێزدی ل ئوكرانیا دژین، پشتی رەوشا شەرێ ئوكرانیا و رۆسیا نیڤەكا ئێزدیێن ئوكرانیا كۆچبەری وەلاتێن ئەورۆپی بووینە و هندەك ژی ماینە هێشتا ل ئوكرانیا دژین».
راوێژكارێ جڤاتا رۆحانیا ئێزدیان، گۆت: میرێ ئێزدیان بۆ هەلسەنگاندن و دیتنا رەوشا ئێزدیان سەرەدانا گوند و دەڤەرێن ئێزدیان ل ئەرمەنیا كر و گەلەك گەنگەشە و دان و ستاندن بۆ پتر رێكخستنا ئێزدیان ل ئەرمینیا هاتنە كرن، ئەڤ سەرەدانێن میر حازم تەحسین بەگ بۆ دیتنا رەوشا ئیزدیێن ئەرمینیا و رۆسیا و ئەمریكا و ئەلمانیا و ل هەموو دەولەتان دژین گەلەك دگرنگن، ژ بەر كو میر حازم گوهداریا گلە و گازندێن ئێزدیان ب گشتی دكەت و هەموو هەولا ددەن ئێزدی پتر ببنە ئێك و پێكڤە بۆ خزمەتا مللەتی خۆ كاربكەن».
