ئەمریکا ب توندی هۆشداریێ ددەتە ئیرانێ
وەزارەتا بەرگریێ یا ئەمریکا دیار دکەت، پشتی ئالۆزیێن ڤێ دووماهیێ ل رۆژهەلاتا ناڤین، ئیران ب رێیا گرۆپێن چەکدار ل سووریێ و ئیراقێ ئێرشی بنگەهێن وان دکەت، هەکە ئیرانێ بڤێت ئالۆزیان دروست بکەت ئەو دێ ب توندی بەرسڤا هەر ئێرشەکێ دەن و دڤێت ئیران ب کریاری نەبیتە پشکەک ژ شەرێ نها یێ ل غەزە.
وەزارەتا بەرگریێ یا ئەمریکا د داخۆیانیەکێ دا دیار دکەت، پشتی شەرێ ڤێ دووماهیێ یێ د ناڤبەرا ئسرائیلێ و حەماسێ دا، ئیران ب رێیا گرۆپێن چەکدار ل ئیراقێ و سووریێ ئێرشی بنگەهێن وان یێن سەربازی دکەت، هەری دووماهیێ ژی ل سووریێ گرۆپێن سەر ب ئیرانێ ئێرشی بنگەهەکێ سەربازی یێ ئەمریکا کرینە، نها ئیران بەرهەڤیان بۆ ئێرشێن توندتر ژی ل دژی ئەمریکا دکەت، هەکە ئیران ل سەر هەلوەستێ خوە یێ نها بەردەوام بیت ئەمریکا ژی ل هەمبەر ئیرانێ و پیلانێن وێ بێدەنگ نامینیت و دێ ب توندی بەرسڤا هەر ئێرشەکێ ژی دەت.
وەزارەتا بەرگریێ یا ئەمریکا ئەو یەک ژی دیار کریە، هەکە ل ئیراقێ و سووریێ ئێرشێن ل سەر بنگەهێن ئەمریکا بەردەوام بن ئەو ئیرانێ وەکو بەرپرسیارا سەرەکی یا وان ئێرشان دبینن و دێ ب توندی ژی بەرسڤا ئیرانێ دەن، چونکی زانیاریێن تەمام ل بەر دەستێ وان هەنە کا چاوا ئیران ب رێیا گرۆپێن چەکدار ل ئیراقێ و سووریێ دڤێت ئاستەنگیان بۆ ئەمریکا دروست بکەت، پیلانێن ئیرانێ مەترسیدارن و ئەو ب توندی هۆشداریێ ددەنە ئیرانێ، کو خوە ژ کارێن وەسا دوور بکەت.
ل ئالیێ دی رۆژناما واشنتۆن پۆست ژی د راپۆرتەکێ دا دیار کریە، ئەمریکا خوە بۆ هەموو ئەگەرەکێ بەرهەڤ کریە، هەکە ئیرانێ بڤێت ب کریاری دەستێوەردانێ د شەرێ نها ل غەزە دا بکەت ئەمریکا ژی دێ دەستێوەردانێ کەت و دێ ب توندی بەرسڤا ئیرانێ دەت.
چاڤدێرێن سیاسی ژی دیار دکەن، شەرێ د ناڤبەرا ئسرائیلێ و حەماسێ دا دشێت ببیتە شەرەکێ نوو و کاریگەریا خوە ل هەموو دەڤەرا رۆژهەلاتا ناڤین بکەت، لێ هەتا نها ژی وەلاتێن عەرەبی ب تایبەتی ژی سعوودیێ نەڤێت شەر بەرفرەه ببیت، چونکی ئەو یەک دێ کاریگەریەکا خوە یا خراب ل بەرژەوەندیێن وان کەت، ئالۆزبوونا رەوشا رۆژهەلاتا ناڤین دێ رێگریێ ل پرۆژێ سعوودیێ کەت، ئەو یەک داخوازا سەرەکی یا ئیرانێ یە و ئیرانێ دڤێت رەوشا رۆژهەلاتا ناڤین ئالۆز بکەت، ژ بەر ڤێ یەکێ ژی ئەمریکا نها ل سەر خەتە و هۆشداری ژی دایە ئیرانێ و ئەمریکا ب چو رەنگەکێ ژی نەڤێت ئسرائیل غەزە داگیر بکەت، ژ بۆ ڤێ یەکێ ژی بەری چەند رۆژان بەرپرسێن ئەمریکا داخواز ژ ئسرائیلێ کرینە جارێ دەست ب چو ئۆپەراسیۆنان بۆ داگیرکرنا غەزە نەکەت.
