ئێرشێن ل سەر هێزێن ئەمریکا ل سووریێ زێدەتر بووینە
بەرپرسەکێ وەزارەتا بەرگریێ یا ئەمریکا راگەهاند، هێزێن سەر ب ئیرانێ چەند رۆژن ل دەڤەرێن جودا جودا یێن سووریێ ئێرشی بنگەهێن وان کرینە و زیان گەهشتینە بنگەهێن سەربازی یێن ئەمریکا، ئەمریکا ژی ل سەر سنۆرێ سووریێ و ئیراقێ ئێرشی هێزێن سەر ب ئیرانێ کریە و ئەمریکا دێ ب توندی بەرسڤا هەر ئێرشەکێ ژی دەت.
بەرپرسەکێ وەزارەتا بەرگریێ یا ئەمریکا راگەهاند، چەند رۆژن ل دەڤەرێن جودا جودا یێن سووریێ هێزێن سەر ب ئیرانێ ئێرشی بنگەهێن وان دکەن، هێزێن ئەمریکا ژی بۆ هەر ئەگەرەکێ خوە بەرهەڤ کرینە و ل سەر سنۆرێ ئیراقێ و سووریێ ژی ئێرشی هێزێن سەر ب ئیرانێ هاتە کرن و زیانێن مەزن گەهشتنە وان، وەکو ئەمریکا وان خوە بۆ هەر ئەگەرەکێ بەرهەڤ کرینە و هەکە ئیران زێدەگاڤیان بکەت و ئێرشێن ل سەر هێزێن ئەمریکا زێدەتر لێ بهێن دێ بەرسڤا ئەمریکا ژی گەلەک یا توند بیت.
هەمان بەرپرسی ئەو یەک ژی دیار کریە، هێزێن سەر ب ئیرانێ ل ئیراقێ، سورویێ و لوبنانێ دخوازن ئالۆزیێن نوو بۆ بەرژەوەندیێن ئەمریکا دروست بکەن، ژ بەر هندێ ژی نها ب پشتەڤانی و ب چەکێ ئیرانێ ئێرشی بنگەهێن ئەمریکا دکەن، ئەمریکا ژی ژ بەر ڤێ یەکێ بەری نها ب توندی هۆشداری دایە ئیرانێ و جارەکا دی ئەم هۆشداریێ ددەینە ئیرانێ کو نەبیتە ئەگەرێ روودانا ئالۆزیێن نوو ل دەڤەرێ.
ئەو یەک د دەمەکێ دایە بەری دو رۆژان وەزارەتا دەرڤە یا ئەمریکا ژی راگەهاند، گرۆپێن چەکدارێن سەر ب ئیرانێ خوە بۆ ئێرشێن بەرفرەه ل سەر بنگەهێن ئەمریکا ل رۆژهەلاتا ناڤین بەرهەڤ دکەن، هەکە ئیران ل سەر هەلوەستێ خوە یێ نها بەردەوام بیت دێ رەوش ئالۆزتر لێ هێت، چونکی وەکو ئەمریکا وان خوە بۆ هەر ئەگەرەکێ بەرهەڤ کرینە و دێ ب توندی بەرسڤا هەر ئێرشەکێ ژی دەن.
ل ئالیێ دی وەزیرێ دەرڤە یێ ئیرانێ ژی دوهی راگەهاند، دڤێت جڤاکێ نێڤدەولەتی ئێرشێن ئسرائیلێ بۆ سەر غەزە بدەتە راگرتن، چونکی بەردەوامیا ئێرشێن نها دێ بیتە ئەگەرێ روودانا کارەساتێن گەلەک مەزن، هەکە ئێرشێن ئسرائیلێ بەردەوام بن ئەو یەک دێ کاریگەریا خوە ل هەموو دەڤەرێ کەت، چونکی دێ شەر بەرفرەهتر لێ هێت، ژ بەر ڤێ یەکێ ژی دڤێت جڤاکێ نێڤدەولەتی فشارێن خوە ل سەر ئسرائیلێ زێدەتر لێ بکەت و دڤێت ئێرشێن ئسرائیلێ یێن ل سەر غەزە د زووترین دەم دا بهێنە راگرتن.
حسێن ئەمیر عەبدوللاهیان ئەو یەک ژی دیار کر، ئەمریکا بەرپرسە ژ کوشتنا خەلکێ سڤیل ل غەزە، دڤێت ئەمریکا و وەلاتێن دی یێن رۆژئاڤایی رێ نەدەن ئسرائیل ب چەکێن پێشکەفتی ئێرشی خەلکێ سڤیل ل غەزە بکەت، چونکی یا نها روو ددەت تاوانەکا مەزنە و مخابن جڤاکێ نێڤدەولەتی ژی ل هەمبەر ئسرائیلێ بێدەنگە.
