ل سەر لێڤا ئازادیێ
شیان مەهدی كانیساركی
بێ دودلی هەمی مللەتان ڕێبەر و ڕێنیشاندەر یێن هەین كۆ ڕێبەریا وان دكەن، لێ كێم ژ وان مللەتێ خوە دگەهینن ئارمانجێ یان دەوروبەرێ وێ. ل دەستپێكا چەرخێ بیستێ ژی چەندین شۆڕەش و سەرهەلدان ل پڕانیا پارچەیێن كوردستانێ سەرهەلدا و دژی بنگەهـ و داگیركەرێن وەلاتی ڕابوون داكو ئاخا خوە ڕزگار بكەن هەروەسان داخوازا مافێن ڕەوا یێن خەلكێ خوە بكەن. ئەڤ پەرتووكا نوكە هوین د بینن «ل سەر لێڤا ئازادیێ» ئەو پێنگاڤ و قۆناغ و هەولێن سەرۆك مەسعود بارزانی نە بۆ گەهاندنا وەلاتێ خوە كوردستانێ بۆ سەربەخۆییێ زێدەباری وان ڕێگری و ئاستەنگێن كەفتین ڕێكا وی، چ ژ لایێ دوژمنێن دەوروبەر یان دویڤەلانكێن وان یێن ناڤخوەیێ! مەسعود بارزانی شیا جوداهییەكا مەزن دناڤبەرا وەلاتێ خوە كوردستانێ و عێراقێ دیاربكەت، ئەو و ل گەل هاریكار و پشتەڤانێن وی ڤێ جارێ شیان كارەكێ جیاواز ژ سالێن بوری بكەن كۆ نە بتنێ ب گۆتن یا خوەش و ب ساناهی بوو بەلكو پێشوەخش دزانی دێ قوربانیێن مەزن ددویڤدا هێن، لێ ئەو چەندەژی یا ئاشكەرایە كۆ كارێن مەزن، مەترسیێن مەزن ل گەل دهێن، ب تایبەت ئەگەر دوژمنێن تە د مەزن و زلهێز بن، ئەڤجا دێ چەوا بیت ئەگەر ئەڤ دوژمنە ژی هەرۆژ ل ناڤ مالا تەبن یان جیرانێن تەبن! لێ بارزانی زانی كۆ ئێدی عێراق نەشێت ژیانەكا ئارام پێشكێشی خەلكێ كوردستانێ بكەت. لێ بارزانی پشتی چەندین شوڕەش و پێنگاڤان شیا ژیانەكا هەتا ڕاددەیەكی سەقامگیر چێكەت ددەمەكی دا عێراق ب ڕەنگەكێ گشتی د ئالۆزیاندا بوو. یا دیار بوو پشكا شێری ئانكۆ ژمارا هەرە مەزن یا خەلكێ كوردستانێ حەزژێكەر و پشتەڤانێن پێنگاڤ ب پێنگاڤێن بارزانی بوون و بۆ وان یا گرنگ بوو، تشتی گرنگ د ڤان هەمی بەرتەنگی و نەخوەشیاندا چاڤێ جیهانێ»ڕۆژنامەگەری» هەمیێ ل كوردستانێ و ڕێبەرێ وێ بوو كا دێ چەوا شێت خوە و وەلاتێ خوە ژ ڤان ئاریشەیان ڕزگاركەت.
ڕاستە نوكە مەسعود بارزانی دەست یێ ژ سەرۆكایەتیێ بەردای، لێ دەست بەردان ڕامانا وێ چەندێ نادەت كو دەست بەردانە ژ كو ببیە كەسەكێ جەماوەری، لەورا نوكە»مەرجع»ێ كوردستانێ و خەلكێ خوەیە، ئەوا جەنابێ وی پێ ڕابووی كەسێ ل بەری وی ئەنجام نەدایە، ئەڤە ژی جهێ شانازیێ یە بۆ وی و بۆ هەمی حەزژیكەرین دەولەت و مللەتێ كورد، ب تایبەت پشتی ئەنجامدانا ڕیفڕاندۆمێ و ڕێژا 93%ێ ژ خەلكێ «بەلێ» هەلبژارتی. خالا هەرە گرنگ ژی ئەوە بارزانی شیا كوردستانێ بەرەف جیهانا ژدەرڤە ببەت. ڕێبەرێ ڕاست و دروست ژی دڤێت گوهێ وی ل هەمی كەس و دەوروبەران نەبیت چونكی ژ وان دەنگێن دهێن دبیت 99% ژ سەدێ د كوژەك و نە تەندروستبن، ڤێ چەندێ ئاخفتنا « كارل فون كلاوزفیتز»ی ئینا بیرا من دەمێ دبێژیت ( ئەگەر ڕێبەرێ مللەتەكی یێ تژی بیت ژ خەون و ئارمانجان و ب مێرانی و ب جەرگ بەرەف وان خەونان ڤە چوو، دێ ل دویماهیێ كەتە ڕاستی ئەگەر چەند نەخوەشی ژی بكەڤن ڕێكا وی ) هەروەسان «ڕۆجر ج-فریتز» ل جهەكێ دی د بێژیت( ڕێبەرێ دروست ئەوە یێ هەمی كاودانان بۆ بەرژەوەندیا مللەتێ خوە ب كاربینیت). هەژیە بێژین ئەڤێ پەرتووكا ل بەردەستێ هەوە ل سالا 2021ێ خەلاتێ BiBA یێ نیڤدەولەتی وەرگرتیە، كو هەرسال د چەندین بواران دا ئەڤ خەلاتە دهێتە بەخشین. ل دویماهیێ سوپاسیا وەرگێڕێ هێژا دكەین كو شیا ڤێ پەرتووكا گرنگ وەرگێڕیتە سەر زمانێ كوردی- بەهدینی داكۆ خەلك و گەنجێ مە بزانن كا خەلكێ بیانی چ سەبارەت مە و ڕێبەرێن مە دبێژن.
* پەرتووكا: ل سەر لێڤا ئازادیێ. The brink of freedom.نڤیسین: داڤان یەحیا خەلیل. وەرگێڕان: حەكیم عەبدوللا.وەشان: ناڤەندا خانی یا ڕەوشەنبیری.ژ.لاپەڕان: 272
